Campaña pa promocionar l'usu del asturianu na hostelería de Llangréu

El Serviciu de Normalización de Llangréu tien en marcha una campaña pa promocionar l’usu de la llingua na hostelería del conceyu. Los términos de la sidra, los pexes y el mariscu, son dalgunos de los aspeutos nos que se centra.

La intención cola que ñaz esta campaña ye “normalizar l'usu del asturianu faciéndolu visible nos restoranes, sidreríes, chigres y centros sociales del nuesu conceyu”. Al mesmu tiempu, tamién se busca “fomentar el consumu nel seutor hosteleru de Llangréu respaldando esta actividá al traviés del usu de la llingua asturiana como reclamu publicitariu que casa mui bien cola idega de cercanía y tratu personalizáu. Búscase afalar l’apreciu polo propio promoviendo l’usu de los términos tradicionales y el vocabulariu propiu dientro del campu semánticu de la sidra”, señalen dende’l Serviciu de Normalización Llingüística llangreanu. “Entendemos que l'asturianu ye una amuesa de la personalidá de los nuesos servicios amás d'una ventaya competitiva, un valir añedíu pal conxuntu’l nuesu seutor hosteleru”, añeden.

Los hosteleros y hosteleres de Llangréu que quieran participar de la campaña van beneficiase de materiales pertenecientes a la campaña ‘La sidra, d’Asturies’, como pegadielles pa los ‘nunmechisques’; cartelos con espresiones sobre la sidra, que tien como base otra campaña de la Xunta pola Defensa de la Llingua Asturiana que llevaba’l nome ‘La sidra como tien que ser’; y un llibrín de 18 fueyes con dellos datos sobre la sidra y la cultura sidrera. Amás, el Serviciu de Normalización de Llangréu va repartir una guía de pexes y mariscos que recueye los nomes d’estos animales en seis llingües, y toallines de llimón con publicidá sobre centros visitables del conceyu, como’l Muséu de la Siderurxa o’l Cine Felgueroso. Al mesmu tiempu, convídase a tolos hosteleros a solicitar el sofitu del Serviciu pa cuntar con una torna personalizada de platos y menús en llingua asturiana.

La Conseyería de Cultura y Turismu, la Xunta Pola Defensa de la Llingua Asturiana y la Rede de Normalización Llingüística nos Conceyos collaboren nesta campaña, yá entamada en L.lena, que va estendese tamién a Siero, Mieres, Mancomunidá del Cabu Peñes y Mancomunidá de la Sidra.

Fonte: Asturies.com