La Universidá d’Uviéu ta acabante de dar un pasu perimportante pa la dignificación de la llingua asturiana na institución. Trátase de la creyación de la Comisión de Normalización Llingüística del Asturianu, que va asesorar al reutor na materia. Esta comisión ñaz por iniciativa del reutoráu col oxetu de cumplir les previsiones del artículu 6 de los estatutos nuevos de la Universidá, en rellación cola proteición y usu de la llingua asturiana.
Dende la institución se señala que la creyación de la Comisión de Normalización Llingüística respuende a “la demanda d’una parte de la comunidá universitaria” y que la so función ye “impulsar actuaciones asemeyaes a les emprendíes nos tres años últimos: la posibilidá de presentar escritos énte’l Rexistru de la Universidá en llingua asturiana; la incorporación del minor o la mención del asturianu nos graos nuevos de Filoloxía y Maxisteriu; l’usu d’esta llingua como instrumentu de comunicación institucional al traviés de la web corporativa; o la torna de dellos testos al asturianu, entre los que s’inclúi la edición reciente de los estatutos nuevos de la Universidá”. Mentes, Santiago Fano Méndez, miembru de les Asamblees d’Estudiantes de la Universidá d’Uviéu y ún de les persones que formen la comisión, asegura que “pa munchos de los que tamos nella, el procesu pasa, a curtiu plazu, pola prioridá de crear un Reglamentu d'Usu y Promoción del Asturianu na Universidá qu'asegure'l so emplegu normal en toles estayes comunicatives: tesis doctorales, esámenes, comunicaciones alministratives, lletreros, etc.; arriendes de puxar polos estudios de de llingua asturiana y el so usu vehicular na docencia”.
El restu de persones que van trabayar na Comisión de Normalización Llingüística del Asturianu na Universidá d’Uvieú son el reutor, Vicente Gotor Santamaría; el vicerreutor d’Informática y Comunicaciones, Víctor G. García García; el direutor del Área d’Aplicaciones de Xestión, David Melendi Palacio; la profesora del departamentu de Filoloxía Clásica y Románica y presidenta de l’Academia de la Llingua Asturiana, Ana María Cano González; el profesor del departamentu de Filoloxía Española, Ramón D´Andrés Díaz; y los estudiantes Inaciu Galán y González, y Xavier Cubero de Vicente.
Fonte: Asturies.com
Ye una bona noticia pal asturianu dientro de la más alta y noble institución académica d'Asturies que ye la Universidá. Pasu a pasu ándase'l camín de la normalización llingüística y de la oficialidá de la llingua. Un bon exemplu a siguir pol gobiernu d'Asturies que nun da un pasu n'esti sentíu, al contrariu paez que tá posicionáu escontra la dignificación de l'asturianu y la oficialidá ensín tener en cuenta los grandes beneficios culturales y económicos que traería p'Asturies tal eventu. Ye un gran pasu de la Universidá.
ResponderEliminar