La Xunta pola Defensa de la Llingua Asturiana fai balance negativu pa la llingua d'una década de gobiernu d'Areces

Fai diez años qu'aportó a la presidencia del Gobiernu d’Asturies de Vicente Álvarez Areces y dende la Xunta pola Defensa de la Llingua Asturiana víen nesti “un momentu bonu pa recordar lo que foi la so política no que se refier a la llingua asturiana”, que xulga “foi de mal en peor, col perconocíu retrocesu nel númberu de falantes al cortase la tresmisión interxeneracional y la falta de drechos fundamentales de les persones qu’usen l’asturianu”.

“Asistimos, inclusive a la persecución de l’Alministración a ciudadanos qu’escueyen llibremente la llingua asturiana pa la so vida normal”, diz la XPDLLA, que camienta que “la política arecista, nesti tiempu, nun foi enxamás a pasar de les declaraciones d’intenciones retóriques y vacíes, de les visiones de la llingua museístiques y acomplexaes. Too ello traxo como consecuencia unes actuaciones llingüístiques pa cubrir l’espediente, omitiendo les sos obligaciones y, munches vegaes, tomando decisiones, por aición o omisión, perxudiciales pal futuru del idioma”.
Esta organización afita que “nun se vio nenguna midida efeutiva p’ameyorar la situación del asturianu nel sistema educativu (sigue la precariedá en tolos niveles), nos medios de comunicación (con una presencia marxinal nos medios públicos) y nos diferentes organismos de l’Alministración (qu’escaecen sistemáticamente lo necesario que ye la tresversalidá de les polítiques llingüístiques)”.

Tamién, la XPDLLA califica d’ “avance” la oficialización de la toponimia de dellos conceyos, que diz, “ye exemplu de participación ciudadana y procuru téunicu, vese burlláu de contino pola falta sistemática de cumplimientu poles propies instancies del Principáu y poles entidaes venceyaes direutamente a ésti (la Radiotelevisón del Principáu d’Asturies, Caxastur... ente otres)”.
Poro, calquen dende la XPDLLA, “cuando ta acabando la murnia y buxa etapa d’inoperacia política del arecismu, pidimos a les persones y partíos que nel futuru tengan responsabilidaes de gobiernu n’Asturies que tornen esta situación de desigualdá xurídica de la ciudadanía declarando la oficialidá de la llingua asturiana. De la mesma manera, habían ser quien a llibrase de les polítiques culturales inútiles y megalomaniátiques, y axeitar unes polítiques llingüístiques series, realistes y eficaces que permitan al idioma ganar falantes y espacios d’usu, asegurando asina’l so futuru”.