1/5/16

Folixa y reivindicación axuntáronse na plaza la Catedral d'Uviéu la selmana pasada


Folixa y reivindicación axuntáronse na plaza la Catedral d'Uviéu
Cientos de persones pasaron pela carpa instalada enfrente de la catedral d'Uviéu pa disfrutar del XXVIII Conciertu pola Oficialidá entamáu pola XDLA y Xunta Moza.
El bon tiempu acompañó y la folixa entamó a primer hora de la tarde con pintacares pa neños y neñes y un taller de coreografía pa calecer motores pal conciertu de Pop Piquiñín. Mientres, los padres pudieron visitar la Feria del Llibru instalada nel llugar, na que participaron Trabe, Pintar-pintar, Suburbia, Algamar, B-Alto, Tierra, Epona y Reciella.
Poco a poco, tres la primer actuación, la de Pop Piquiñín, la carpa foi enllenándose de públicu pa ver a Tuenda y Vrienden, llegando a tar prauticamente completa pa l'actuación de la nueche con más repercusión mediática, la de Nacho Vegas, que tuvo acompañáu pol Coru Al Altu la Lleva. Como traca final, Dixebra y Skontra fixeron blincar al públicu, que disfrutó como siempre nun eventu que muestra la bayura musical en llingua asturiana que disfrutamos nel país y reivindica al empar un futuru pal nuesu idioma nun ambiente folixeru.
Carlos Pulgar, voceru nacional de la Xunta pola Defensa de la Llingua Asturiana (XDLA), amosó la so satisfaición "pol bon ambiente qu'hebo y pola respuesta del públicu". Nesi sen, apuntó que "salió igual de bien que nes meyores ediciones últimes en Xixón" y destacó la visibilidá que tuvo'l conciertu al tar asitiáu na plaza la Catedral, en plenu centru d'Uviéu.
Fonte: Asturies.com

No hay comentarios:

Publicar un comentario

Los comentarios tán pendientes de moderación. Espublizaránse lo primero dable.