'Diez negrinos', doblaxe próximu al asturianu de Gonzali Producciones

 "And then there were none", filme estauxunidense dirixíu nel 1945 por René Clair y basáu na novela d'Agatha Christie 'Ten little niggers', va ser dobláu al asturianu por Gonzali Producciones. La versión asturiana va llamase 'Diez negrinos' y va tar fecha en parte pola primer promoción de la Escuela de Doblaxe.Gonzali Producciones

  La película, protagonizada por Walter Huston, Roland Young, Louis Hayward, June Duprez, Barry Fitzgeral, C. Aubrey Smith, Judith Anderson, Mischa Auer, Richard Haydn, Queenie Leonard y Harry Thurston, toma'l nome del títulu col que s'espublizó la novela de la escritora británica nos Estaos Xuníos por mor de lo políticamente correuto. Foi la primer adaptación cinematográfica de la obra policiaca y destaca por ser abondo fiel a la mesma.

  La historia trata sobre "diez persones invitaes a pasar la fin de selmana nuna mansión allugada na remota Islla del Negru. Toos recibieren la invitación del misteriosu señor Owen, al que naide nun conoz, pero que per aciu d'un grabación en discu va acusalos individualmente de ser responsables de crímenes del pasáu. A partir d'esi momentu entama la sucesión d'asesinatos", espliquen dende Gonzali Producciones.

  Esta empresa responsable del doblaxe profesional n'asturianu dende 2010, con 16 trabayos realizaos hasta agora, ente los que destaquen 'Los viaxes de Gulliver' (2010), 'El tercer home' (2011), 'McLintock' (2011), 'La nueche de los muertos vivientes' (2012), 'El rostru impenetrable (One-eyed Jacks)' (2013) o 'Harry el suciu' (2014), éstos dos últimos pa la TPA, va contar pa esti trabayu col llabor d'alumnos de la primer producción de la Escuela de Doblaxe de Gonzali Producciones. Iyán Gonzali va encargase de dirixir el procesu de traducción de la película.                                                                           Fonte: asturies.com