Asturies pierde un referente nel estudiu de la so hestoria

Juan Ignacio Ruiz de la Peña. Semeya propiedá del RIDEA

  Juan Ignacio Ruiz de la Peña finaba esti martes pero dexaba a Asturies un gran legáu gracies al so trabayu nel estudiu de la hestoria del país. Especializáu na época medieval, ye importante sobre manera nel estudiu de la formación de les poles asturianes.

  Caderalgu d'Historia Medieval, tuvo como maestru a Juan Uría, dando continuidá al so xeitu asturianista nos sos trabayos. Nellos, amás de les poles, tamién estudió el comerciu medieval y les pelegriciones, y foi autor de numberosos llibros sobre la época histórica na que s'especializó, l'Altu Medievu. Amás collaboró na redaición de la 'Gran Enciclopedia Asturiana'.

  L'uviedín ocupó'l cargu de vicerrector de la Universidá d'Uviéu n'época del rectoráu d'Alberto Marcos Vallaure, el primeru eleutu de la institución asturiana nel añu 1983, y nel 2008 foi nomáu direutor del Real Instituto de Estudios Asturianos (RIDEA), entidá de la que formaba parte dende l'añu 1971 y que dirixó hasta'l 2013.

  El funeral pol so alma va celebrase esta tarde, a les 17 hores, na ilesia parroquial de San Tirso el Real, pa depués ricibir sepultura cristiana nel cementeriu d'El Salvador.

Condolencies del Gobiernu         El Gobiernu emitió ayeri una nota na que llamentaba la muerte de Ruiz de la Peña y na que destacaba la trayeutoria docente y investigadora del caderalgu, con un reconocimientu internacional. "Xunió a a lo intensa actividá como profesor universitariu un gran llabor investigadora y una producción científica de calidá", destacaron dende l'Executivu.                                                                                       Fonte: asturies.com