Inaciu Galán
El vienres 6 de mayu salimos otra vegada a la cai pa reclamar la oficialidá del asturianu. La primer gran manifestación pol asturianu tuvo llugar un 22 de xunu de 1976 en Xixón, embaxo’l llema “Autonomía rexonal. Bable nes escueles”. Cuarenta años más tarde, l’asturianu ta nes escueles de forma precaria, l’autonomía nun foi la ferramienta que s’esperaba pa salvaguardar ya impulsar hacia’l futuru a la nuesa llingua y la nuesa cultura. Pero ye innegable, diéronse pasos, anque toos ellos nun llegaron de baldre o por iniciativa propia de les instituciones, sinón gracies a la reivindicación, la movilización y la presión ciudadana a los nuesos dirixentes.
Un añu más, organizaciones sociales, culturales y polítiques, ciudadanos y ciudadanes de toa procedencia, xuntámonos n’Uviéu pa recordar que la reivindación sigue equí, y camín del mediu sieglu de manifestaciones (y les que faigan falta), la ciudadanía nun cansa. Nun cansamos, non porque mos preste manifestanos, sinón porque les persones que vivimos n’asturianu, atopámonos cada día colos problemes propios de ser usuarios d’una llingua non oficial, y polo tanto, una llingua qu’en munchos ámbitos, sobre manera los institucionales, nun esiste. Porque vivimos con menos drechos, y nun mos queda otra que salir a la cai a recordar esta inxusticia denunciada por numberosos organismos internacionales nestos cuarenta años.
Esta nun ye una llucha por imponer nada a naide, ye una llucha poles llibertaes y los drechos ciudadanos, una llucha por da-y futuru al elementu más importante de la nuesa identidá. Ye una llucha pa que nengún paisanu nin paisana sienta vergoña nunca más por usar la so llingua propia fuera de casa, porque nengún neñu nin neña dexe de falar la llingua que siente en casa porque na escuela-y dicen qu’aquello ye falar mal, una llucha xusta y que demostró nestes cuatro décades que tien un sofitu ciudadanu incansable y que cada vegada ye más mayoritariu, anque dalgunos responsables políticos sigan ensin decatase d’esta realidá.
Fonte: Asturias24
40 años: pos bastantes encoteraos ya intelixentísimos y superdotaos políticos profesionales asturianos "los de tola vida (ensin dar palu a l'agua)" entá nun entendieron nada de nada. Bien burricos son los probinos.
ResponderEliminar"Ye una llucha poles llibertaes y los drechos ciudadanos, una llucha por da-y futuru al elementu más importante de la nuesa identidá. Ye una llucha pa que nengún paisanu nin paisana sienta vergoña nunca más por usar la so llingua propia fuera de casa, porque nengún neñu nin neña dexe de falar la llingua que siente en casa porque na escuela-y dicen qu’aquello ye falar mal, una llucha xusta y que demostró nestes cuatro décades que tien un sofitu ciudadanu incansable y que cada vegada ye más mayoritariu, anque dalgunos responsables políticos sigan ensin decatase d’esta realidá" (sic)
ResponderEliminarCada quatre anys aquests ciutadans voten els mateixos polítics que no s'adonen d'aquesta realitat. O d'altres de nous que tampoc no se n'adonen. Potser els ciutadans no valoren la seva llengua.
Eliminar