Cúmplense 208 años de la proclamación de soberanía de la Xunta Xeneral d’Asturies

  El 25 de mayu del 1808 la Xunta Xeneral proclamóse soberana rebelándose contra les tropes franceses de Napoleón qu’invadieren el país. Esti miércoles cúmplense, otra vuelta ensin conmemoración institucional nenguna, 208 años d’esa fecha histórica p’Asturies.

  La declaración de soberanía de la Xunta Xeneral llevó a la organización d’un exércitu asturianu propiu y al unvíu d’embaxadores a Inglaterra pa pidir sofitu na llucha contra l’exércitu francés invasor. Amás supunxo la creación de la bandera d’Asturies, similar a l’actual, que llevaba la cruz de la victoria y el lema ‘Asturias xamás vencida’.

  L’escaezu institucional torna a protagonizar esta fecha, que pa munchos debería ser la xornada de celebración del Día de la Nación Asturiana en cuenta del 8 de setiembre, Día de la Santina, con connotaciones relixoses. A diferencia d’años anteriores, nesta ocasión tampoco nun habrá concentración entamada pola sociedá civil pa festaxar el 25 de mayu nun ambiente reivindicativu.

  La organización moza Darréu sí emitió un comunicáu nel que señala que los fechos del 25 de mayu del 1808, “cola so necesaria contestualización nun momentu concretu de la nuesa hestoria (y entendiendo los sos fines), nun dexen de ser un exemplu perclaru d’exerciciu de la soberanía popular emburriáu d'abaxo a arriba, el primeru que podemos atopar na hestoria d’Asturies na conceición moderna de soberanía, y polo tanto una de les dates que nun pueden faltar nel calandariu d’alcordanza y reivindicación del nuesu país”.

  Tres destacar el papel de la mocedá nestos acontecimiento, la organización afirma que “208 años depués, ye más necesaria que nunca la soberanía popular asturiana, nun contestu nel que’l centralismu, la carencia de competencies y capacidá real de desendolcar polítiques propies, xunío a les inxusticies propies del sistema capitalista, llévanos a una situación de paru, precariedá, emigración, desigualdá, y en definitiva falta d’un futuru dignu p’Asturies en toles sos vertientes”.

Artículu y ficha didáutica         Coincidiendo con esta fecha histórica pal país, Asturies.com recupera un artículu d’Alicia Laspra Rodríguez na revista 'Asturies. Memoria encesa d'un país', de la Fundación Belenos, sobre les rellaciones d’Asturies y Inglaterra demientres la Guerra d’Independencia. Tamién enllazamos un artículu del historiador Faustino Zapico sobre'l 25 de mayu espublizáu nel so blogue 'L'arcu de texu' nel 2013.

  Tamién, pa los más mozos, presentamos la ficha didáutica sobre’l 25 de mayu del 1808, pa trabayar con ella en clase d’asturianu o en casa.                                      Fonte: asturies.com