Asturies ta homenaxando estos díes a la nuesa lliteratura y los escolinos del país nun diben quedase atrás. Coincidiendo cola Selmana de les Lletres Asturianes entámense actividaes especiales en clase y la programación oficial inclúi dellos eventos.
Asina, esta mañana grupos d'escolinos y escolines pudieron visitar la Xunta Xeneral y el cascu históricu d'Uviéu con un guía en llingua asturiana. Mañana van poder facer lo propio los alumnos d'otros centros educativos, anque nesta ocasión les visites guiaes van facese al barriu xixonés de Cimavilla. Tamién en Xixón (19 hores, Centru Municipal Integráu de L'Arena), los neños y neñes de más edá van tener la posibilidá d'acudir a la presentación de 'Fontenebrosa III: el final', llibru que ganó'l VIII Premiu María Xosefa Canellada de lliteratura infantil y xuvenil, cola que Vicente García Oliva completa la triloxía d'esta historia fantástisca.
El xueves, a les 18 hores, va celebrase nel xixonés Teatru de la Llaboral la gala d'entrega del III Certame de Teatru Escolar en Llingua Asturiana/Gallego-Asturiano, que nesta ocasión llevaron el Colexu Públicu Versalles, d'Avilés, cola obra 'Escaecer' en Primaria, y el Centru Rural Agrupáu Villayón, con 'El trato del cocho' en Secudaria y Bachilleratu. Estes obres van representase nesti eventu con entrada llibre, al igual que'l restu de creaciones gallardonaes.
El XXXVII Día de les Lletres Asturianes va tener llugar el vienres y los alumnos del IES Valle d'Ayer, en Morea, van acoyer esti añu les actividaes del actu escolar institucional por mor de la Selmana de les Lletres Asturianes. Nél van entregase los premios de XXI Certame de Creación Artística/Lliteraria, los del XIII Certame de Cartelismu y los del V Certame de Creación Audiovisual.
Espectáculu musical 'Bestiariu'
Ente'l restu d'actividaes que completen la Selmana de les Lletres destaca l'espectáculu musical 'Bestiariu', basáu nel discu de mesmu nome producíu por La Fabriquina y editáu por Araz.net, empresa editora tamién d'Asturies.com. Asina, van interpretar el sábadu, a les 19 hores nel Teatru Vital Aza de La Pola Ḷḷena, los sos cantares del álbum los grupos FMM, Felpeyu, Los Bonsáis, Pauline en la Playa, Nacho Álvarez y el Quarteto Bendición, Guiller Momonje, Muga y el corín de Reciella, La Villana (Natalia Quintanal), Dixebra y David Varela con Pop Piquiñín.
Yá'l llunes, a les 10.30 hores nel Paraninfu de la Llaboral, Carlos Alba 'Cellero' va representar l'espectáculu 'Mitoloxíes' pa escolinos de Primaria, mentes que'l turnu pa los de Secundaria va ser el martes, a les 11 hores nel Teatru de la Llaboral, con 'La lloca historia d'Asturies', de la compañía Escena Apache. Pa finar, va zarrar les actividaes de la Selmana de les Lletres Asturianes el primer concursu de microrrellatos improvisaos n'asturianu 'Entaína a escribir', destináu a la xente mozo, que va desendolcase a les 19.30 hores na uviedina Sala Borrón.
Fonte: Asturies.com
No hay comentarios:
Publicar un comentario
Los comentarios tán pendientes de moderación. Espublizaránse lo primero dable.