Lluismi Orviz (Podemos): "Pa salvar situaciones como ésta ye polo que se necesita la oficialidá"

por Pablo R. Guardado

Podemos Asturies considera que les pallabres de Mercedes Fernández busquen "desviar l'atención de los casos de corrupción del PP".

Lluismi Orviz, responsable del área de Plurillingüismu de Podemos Asturies, esplica qu'al PP "nun-y falta razón" na so argumentación pa defender l'usu del castellanu como llingua única de comunicación interna na Xunta Xeneral y la propia Alministración "porque la normativa asina lo contempla". Por esti motivu, aboga pola declaración de la oficialidá del asturianu como solución única a esti problema: "Pa salvar situaciones como ésta ye polo que se necesita la oficialidá", afirma.

Al respeuto, añede que la Llei d'Usu y Promoción del Bable/Asturianu nun entra nesti tarrén, "que ye lo que la diferencia de lo que supondría la oficialidá". Tamién puntualiza que l'usu del asturianu nesti casu ye de voluntá política, yá que'l Lletráu Mayor de la Xunta Xeneral apuntó a los voceros de los grupos que, nel casu d'haber alcuerdu ente ellos, l'usu del asturianu nun supondría problema nengún. Finalmente, l'alcuerdu foi pa nun emplegar l'asturianu, lo qu'apoyaron PP, FSA-PSOE, Foro y Ciudadanos, quedando en solitariu Podemos y IX na defensa del usu de la llingua asturiana.

Otra manera, entrugáu pol polémicu tweet de Fernández, Orviz considera que ye una manera de "desviar l'atención de los casos de corrupción" que tán ximelgando al PP nos últimos meses, con una incidencia especial na selmana última.

Fonte: Asturies.com