El conseyeru d'Educación y Cultura confirmó al diputáu Héctor Piernavieja que'l gobiernu asturianu va modificar el curriculum del segundu ciclu d'Infantil p'asegurar l'enseñu del asturianu nesta etapa educativa. Afirmó tamién que los escolinos de los colexos mierenses Llerón Clarín y Anicetu Sela tendrán 3 hores d'asturianu.
Ésta ye la solución plantegada por ser l'únicu tiempu del que dispón la maestra de Llingua Asturiana, contratada a mediu xornada. Los padres d'estos centros denunciaran la situación depués de que los neños y neñes d'Infantil quedaran esti cursu ensin clase d'asturianu por falta de tiempu de la profesora.
Hai que recordar que la materia de Llingua Asturiana y Gallego-asturiano nun ta incluyida nel currículum d'Infantil, polo que nun se suel impartir nos centros educativos asturianos pese a ser esta etapa de vital importancia nel desarrollu de los neños y neñes. Esta situación cambiará próximamente, según confirmó Genaro Alonso. Trátase d'un de les midíes qu'inclúi'l Plan de Dignificación de la Llingua Asturiana aprobáu por FSA-PSOE, Podemos, IX y Foro.
El diputáu de Podemos aprovechó la so intervención pa comentar que "sirva esta entruga y la so contestación p'amosar a determinaos grupos d'esta cámara que nun puen votar escontra la llibertá de falar asturianu. La Declaración Universal de los Drechos Humanos recueye los drechos llingüísticos, yá abondo frayaos n’Asturies cola comunidá asturfalante. Esta cámara va usar l'asturianu porque ye un drechu de quien tamos equí y de miles de persones fora. Namás los retrógrados puen votar escontra los drechos humanos". Fonte: Asturies.com
No hay comentarios:
Publicar un comentario
Los comentarios tán pendientes de moderación. Espublizaránse lo primero dable.