10/2/16

Iniciativa denuncia que la RTPA sigue escaeciendo l’asturianu

Iniciativa denuncia que la RTPA sigue escaeciendo l’asturianu
Iniciativa pol Asturianu denuncia la falta d’impulsu al idioma 100 díes dempués del alcuerdu que renovó a Antonio Virgili na direición de la RTPA, qu’apuesta polos conteníos dixitales pero escaez l’asturianu.
Iniciativa pol Asturianu denunciaba esti día nuna nota de prensa “l’ausencia de midíes favoratibles a la llingua na RTPA cuando se cumplen 100 díes del alcuerdu ente PSOE, PP ya IX pa caltener a Antonio Virgili como direutor xeneral”.
La organización de defensa de los derechos llingüísticos alvierte de que’l porcentaxe d’emisiones na llingua propia nun medró nin nestos 100 díes nin nos más de seis meses dende que PSOE ya IX alcordaron incrementar la presencia del asturianu nos medios de comunicación de titularidá pública a cambiu de facer presidente a Javier Fernández: “esta circunstancia produzse amás nel contestu d’una cayida hestórica de les audiencies, que, no que llevamos d’añu, baxaron al 4 por cientu, datu qu’amuesa los perxuicios de nun apostar pola llingua propia, una y bones ye conocíu l’interés qu’espierten ente los ciudadanos los programes n’asturianu, siempres con mui bonos datos. La falta de voluntá de Virgili vióse tamién estos últimos díes al proponer al Conseyu d’Alminstración una nueva direición de Conteníos Dixitales en cuenta d’una de Conteníos n’Asturianu que valiera p’afalar la presencia de programes na llingua propia”.
Sicasí, la organización cívica recuerda que tovía falten por cubrir dellos puestos de direición que son estratéxicos pa la sobrevivencia del idioma. Iniciativa pol Asturianu considera imprescindible que les incorporaciones nueves a la direición de la RTPA tengan un mayor compromisu cola normalización llingüística qu’el que vien demostrando l’actual director xeneral. Pa ello, Iniciativa pol Asturianu pide a les fuercies polítiques firmantes del alcuerdu que cumplan colos sos compromisos y que l’asturianu gane espacios de normalidá, con tresversalidá y calidá, na RTPA. Fonte: Asturnews
Más info en: http://asturies.com/noticies/cien-dies-de-virgili-ensin-novedaes-pa-col-asturianu 

3 comentarios:

  1. RTPA y el so direutor son ferramientes del PSOE antiasturianu que carecemos nel gobiernu del Principáu.

    ResponderEliminar
  2. Virigili ye la voz del so amu como otru emplegáu más que por contratu obedez les conseñes del empleador esto ye d'esi visceral y atávico PSOE tan anti llingua asturiana. Curiosu: ¿d'ónde-y vendrán eses raigaños tan antiasturianistes? porfa si daquién saber que lo conteste más embaxo.

    ResponderEliminar
  3. Los de siempre -psoe y adláteres- siguen echando balones fuera y buscando mil escusas p'amarutar les sos intenciones en contra de la llingua asturiana., Virgili nun pinta absolutamente nada, a obedecer y callar.

    ResponderEliminar

Los comentarios tán pendientes de moderación. Espublizaránse lo primero dable.