Somos esixe’l cumplimientu de la llegalidá toponímica n’Avilés

Ante los postreros fechos producíos en rellación col cambéu d’indicadores toponímicos en Llaranes, Somos Avilés esixe a los responsables municipales d’Aviles el cumplimientu estrictu de la llegalidá nesta materia.

Dempués de que la empresa encargada del cambéu d’indicadores toponímicos en Llaranes usara formes con faltes manifiestes, el Conceyu d’Avilés solicitó a los responsables camudar los lletrerospa correxir estos erros, sigún desplica Somos nuna nota de prensa asoleyada esti xueves. Sicasí, nun-yos recordó’l cumplimientu de la llegalidá toponímica vixente.

Nesti sentíu, la señalización nueva acabante asitiar en Llaranes, otra vegada, ta apinada d’incorreiciones al nun traer nella la denominación correuta de los núcleos de población, apaeciendo topónimos que yá nun tienen la considerancia d’oficiales: “Anque nunca fuera de manera tan simbólica, nun ye la primer vegada qu’esta llegalidá toponímica nun se respeta n’Avilés y ello vien demostrar una falta d’interés per parte del consistoriu repitida y reprobable”.

Dende Somos Avilés quieren recordar al equipu de gobiernu que l’espediente toponímicu del conceyu foi aprobáu definitivamente pol Plenu’l 16 de setiembre de 2010 y publicáu nel BOPA con fecha de 4 d’avientu de 2010, momentu en que los nomes recoyíos nél pasen a ser los únicos oficiales. Asina, queda bien claro al manifestar textualmente que: «Los topónimos determinaos nel presente decretu tienen la considerancia de denominaciones oficiales, sustituyendo a -yos enantes vixentes, si haber». Per otru llau, tamién diz que les Alministraciones Públiques, van afaer de manera progresiva, acordies con les sos posibilidaes presupuestaries y, sía que non, al momentu de la so renovación les rotulaciones en víes públiques y carreteres lo mesmo que de mapes y planos oficiales a les formes toponímiques establecíes nesi decretu, cuestión ésta que, polo que se ve, el Conceyu d’Avilés nun cumple.
Pa Somos Avilés “la recuperación d’estos nomes ye fundamental pa nun perder la identidá, la hestoria y la cultura propia; tratar d’un asuntu que tesciende lo puramente políticu al entrar nel terrén de la memoria colectivo y sentimental d’esos llugares. Por ello, vamos presentar nel Plenu d’esti mes de febreru un ruegu p’amosar el nuesu refugu a esta situación y esixir al gobiernu local que cumpla cola llei, que nun se vuelvan a producir casos similares y tamién qu’encamiente al INE y demás organismos estatales a utilizar los topónimos correctos del conceyu”.

Fonte: Asturnews