Con motivu del Día Internacional de la Llingua Materna, dellos servicios de normalización llingüística d’Asturies presentaron güei vienres el blogue de la campaña “¿Ayúdote yo?”. Involucrar a distintos grupos d’edaes na conservación y usu del asturianu ye l’oxetivu plantegáu por esta campaña que desendolcaron nel cursu escolar 2014-2015 los conceyos de la Mancomunidá d’El Cabu Peñes, Siero, Castrillón, Samartín del Rei Aurelio y Avilés.
Dende estos conceyos propúnxose una actividá a les families, les escueles o cualesquier grupu de xente interesao pa qu’interactuaren y aportaren testos, vídeos, audios, dibuxos o caricatures d'estes frases tan sentíes nes families que yá formen parte de la nuestra vida cotidiana.
Y asina, el blogue presentáu ye’l resultáu d’apilar tou esi material recoyío los últimos meses y espérase que valga como ferramienta prestoso pa trabayar nes escueles y en familia.
Na so presentación nel Centru Polivalente “La Baragaña” de Candás tuvieron presentes los responsables de los servicios de normalización llingüística implicaos y contóse amás cola collaboración del actor Carlos Alba Cellero, que presentó l’actu y ufiertó un monólogu sobre les espresiones que recueye el blogue.
Fonte: Asturies.com
No hay comentarios:
Publicar un comentario
Los comentarios tán pendientes de moderación. Espublizaránse lo primero dable.