La política llingüística del Gobiernu va centrase en “potenciar al máximu'l desarrollu del marcu llegal vixente”

por Pablo R. Guardado

El conseyeru Genaro Alonso intervino esti miércoles énte la Comisión d’Educación y Cultura de la Xunta Xeneral. Anunció una mayor presencia del asturianu na programación de la RTPA y más presupuestu pa l’ALLA.

La planificación llingüística ocupó parte de la esposición d’Alonso del programa de gobiernu nel so área. Asina, el conseyeru señaló que “pretendemos a lo llargo d’esta llexislatura qu’agora iniciamos da-y un puxu decidíu al desarrollu de la política llingüística y, con esti fin, fiximos los cambios estructurales yá anunciaos: la Direición Xeneral de Planificación Llingüística y Normalización baxo la dependencia direuta del titular de la Conseyería d’Educación y Cultura. Nun ye una cuestión nominalista, sinón un cambiu estructural que supón l’asunción de compromisos nuevos y retos”.

“El oxetivu principal”, continuó, “podemos resumilo en potenciar al máximu el desarrollu del marcu llegal vixente, la Llei 1/98 del 23 de marzu d’Usu y Promoción del Bable/Asturianu, y dende esti marcu xurídicu fomentar, promover, dignificar y difundir l’asturianu y el so usu, y del gallego-asturiano nel so ámbitu propiu”. Alonso tamién fixo referencia a una mayor presencia del idioma na RTPA, con programes que dean una visión normalizada del mesmu, asina como una partida mayor pa l’Academia de la Llingua Asturiana (ALLA).

No que respeuta al terrén educativu, aseguró que la Llingua Asturiana y el Gallego-asturiano va ufiertase en tolos centros que reciban fondos públicos. D’igual forma señaló la so impartición tamién na Educación Infantil, una demanda vieya del asturianismu.

Plan especial del Prerrománicu

Na so intervención, Alonso tamién trató sobre la so intención de convocar oposiciones pa reducir la interinidá, places que van depender de los Presupuestos Xenerales, y destacó’l so enfotu na meyora de la Formación Profesional y de la situación de les escueles rurales. No que respeuta a la estaya cultural, destacó que “la proteición del patrimoniu históricu artísticu constitúi una piedra angular de la política cultural, yá que ye una ferramienta indispensable pa conocer quiénes somos, d’ónde procedemos y tamién aquello que podemos llegar a ser”, polo que pretende potenciar el conocimientu de dicho patrimoniu por parte de la ciudadanía.

Ente otros aspeutos, anunció la creación d’un Plan especial del Prerrománicu, el fomentu de les rutes asturianes del Camín de Santiago y la instauración del Conseyu Asturianu de la Cultura y de les Artes, que va tar conformáu por persones de trayeutora reconocida nesi terrén.

Fonte: Asturies.com