Asturies va celebrar el Día de la Nación Asturiana con actos per tol país

   Esti martes ye 8 de setiembre, xornada na que se celebra'l Día de la Nación Asturiana. La Llegra, Podemos, IX y el PAS entamen actos. Colunga acueye les actividaes qu’organiza’l Gobiernu.

   Baxo’l paragües de ‘Lluchando pola soberanía’, La Llegra torna a apostar por axuntar un bloque soberanista pa esti 8 de setiembre. “Frente a la parafernalia gubernamental, autocomplaciente y afitada en falsos rellatos como’l Cuadonguismu, vemos qu’otru 8 de Setiembre más faise imprescindible salir a la cai a reivindicar que nesta Asturies, poco o nada hai que cellebrar, y sí muncho que siguir construyendo a comuña, nesa pernecesaria visión alternativa d’Asturies cola que valtiar les problemátiques que mos afecten”, espliquen na convocatoria.

   La crisis, la perda de población, la sumisión a Madrid y Bruxeles, la defensa de los derechos llaborales, llingüísticos y de la muyer, y la necesidá de polítiques sociales reales son dalgunes de los temes que toquen les reivindicaciones d’esta xornada. “Puxamos, polo tanto, por superar un sistema capitalista que, sirviéndose les sos ferramientes estatales y supraestatales, niega al nuesu pueblu’l mandu de la economía, de los recursos naturales, de les polítiques sociales a desarrollar, de cómo rellacionanos con otros pueblos: en definitiva, niega la construcción d’un futuru dignu pa les clases populares de la nuesa nación”, afirmen.

   La concentración d’Uviéu va tener como sede’l Paséu Los Álamos a les 12.30 hores. Mentes, a les 14 hores, van desendolcase xuegos tradicionales, actuaciones musicales y una xinta popular na plaza’l Paragües. Esta convocatoria cuenta col sofitu de Darréu, Xunta Estudiantil Asturiana, Corriente Sindical d’Izquierda (CSI), Conceyu Abiertu y Andecha Astur.

Monedero y Teresa Rodríguez, nel Pueblu d’Asturies        Una folixa popular, entamada por dellos coleutivos políticos y sociales, ente ellos Podemos, va ser la principal novedá d’esti Día de la Nación Asturiana. Va tener como sede’l Muséu del Pueblu d’Asturies y va contar cola presencia como convidaos del politólogu Juan Carlos Monedero y de la vocera de Podemos Andalucía, Teresa Rodríguez. Dambos van participar nuna mesa redonda, de nome ‘De qué hablamos cuando hablamos de unidad popular’, prevista pa les 13.30 hores na que tamién tán confirmaos Dani Ripa, secretariu xeneral de Podemos Asturies; Marcos Muñiz, d’Asturies pola Unidá; y Rosa Martínez, covocera federal d’EQUO. Modera l’eventu Eva Fernández, vicepresidenta de la Sociedá Cultural Xixonesa.

   A les 16.30 hores, ta prevista otra mesa redonda, nesta ocasión centrada na ‘Cultura y política en tiempos de cambio’, cola presencia de David Acera, de SOS Cultura; José Manuel Sande, conceyal de Cultura d’A Coruña; Jorge Lago, coordinador del Instituto 25M; y Orlando Fernández, conceyal de Xixón Sí Puede. La moderación va correr a cargu de la editora Silvia Cosío.

   L’actu central de la folixa popular va desendolcase a les 18 hores y va tener como presentadores a Xune Elipe y Penélope Miranda. Nél van intervenir Monedero y Teresa Rodríguez, amás del diputáu Emilio León, el conceyal de Xixón Sí Puede Mario Fueyo y la edil de Somos Uviéu Ana Taboada. Darréu va celebrase un conciertu (19 hores) coles actuaciones de Felpeyu, Rodrigo Cuevas y Truequedart.

   Otra manera, l’actividá nel Pueblu d’Asturies va principiar al meudía y va contar con un mercáu del llibru, discu, artesanía y productos ecolóxicos, amás de talleres infantiles, presentaciones, música y una xinta popular prevista pa les 15 hores, ente otres actividaes.

Actuación de Nuberu en Cangues d’Onís     Como ye vezu, Izquierda Xunida (IX) tamién va celebrar el Día d’Asturies con un actu políticu, nel que va tar otru añu más el coordinador federal Cayo Lara. Presentáu pol área ‘Faciendo país’, nesta ocasión va tener como sede Cangues d’Onís, en concreto la finca Villa María, y nél tamién van participar Leticia de Nava y el coordinador d’IX Asturies, Manuel González Orviz.

   Tres les intervenciones polítiques, previstes pa les 13 hores, va celebrase una xinta (15) y va actuar Nuberu (16.30 hores). IX pon autocares pa toles persones interesaes n’acudir a esta cita dende Avilés, Xixón, Uviéu, Mieres, Llangréu y L’Entregu.

Homenaxe floral a Pelayo            El Partíu Asturianista (PAS) tamién caltién les sos costumes pa esta xornada y va facer un homenaxe floral a Pelayo, “fundador del Estáu asturianu’, na estatua que tien llevantada en Xixón. Va ser a les 12.30 hores, pa depués celebrar una xinta de xeremandía.

   D’igual forma, la formación afala a tolos asturianos a sacar la so bandera del país nos sos balcones y ventanes pa celebrar esti día.

La folixa entamada pol Gobiernu, en Colunga         Los productos artesanos, el deporte y la cultura tradicional son los protagonistes de les actividaes programaes pol Gobiernu pal Día de la Nación Asturiana, qu’esti añu tien como sede Colunga. Éstes van principiar a les 17 hores de güei, cola apertura del Mercáu Tradicional y la Feria de Productos Artesanos, que s’ubicará na plaza del Monumentu, la cai Doctor Grande Covián y la redolada de la plaza d’Abastos, onde tamién va asisitase la I Feria del Comerciu.

   Los Xardinos Tomás Montoto van acoyer conciertos de tonada güei (18 hores) y mañana (16.30 hores), día nel que tamién va actuar el Coro Marinero Manín de Llastres (19.30 hores). Danny Daniel va xubir al escenariu instaláu na avenída del Sueve a les 21 hores d’esta nueche, pa depués dar pasu Alberto & García (23 hores). Mentes, mañana va ser el turnu de Xuacu Amieva (20.30 hores) y Bueno (22 hores).

   Pa facilitar l’asistencia de ciudadanos van ponese autobuses llanzadera ente Colunga y Llatres, con paraes na playa de La Griega y el Muséu del Xurásicu d’Asturies. Éstos van tar disponibles dende les 16.30 hores, güei, y dende les 10.30 hores, mañana.
Fonte: asturies.com

Adxuntu	Tamañu
Cartelu Lluchando pola Soberanía.jpg	113.43 KB
Programa Folixa Popular del 8-S.jpg	69.25 KB
Cartelu actividá d'Izquierda Xunida pal 8-S.jpg	47.43 KB
Programa Día d'Asturies en Colunga.pdf	2.05 MB