Fran Allegre presenta’l so tercer llibru n’Asturies

Na semeya, el músicu y escritor lleonés Fran Allegre

   El músicu llionés Fran Allegre presenta el so tercer llibru “Deixándo’l cuerpu” esta selmana per Asturies: el día 30 miércoles a les 20 na biblioteca pública d’Uviéu, y el xueves nel Institutu Xovellanos de Xixón a las 20,30, y a les 22 nel chigre Trisquel.

   “Deixándo’l cuerpu”, acabante aportar a les llibreríes esti branu, ye’l tercer llibru, el segundu de poemes, dempués d’una obra de teatru, del tamién músicu llionés Fran Allegre (Franciscu Xavier Pozuelu Allegre) que tien una bona riestra de trabayos espublizaos, amás de ser un nomáu concertista na vecina rexón llionesa y per muchos llugares del esternu.

   Fran Allegre entamó en 1995 a esperimentar cola música y dos o tres años dempués entamó a dedicase a la música, l’espardimientu cultural y artesanía de construcción de preseos musicales tradicionales lleoneses. De formación autodidacta, basada na esperimentación, Fran constrúi zanfoñes, chifles, tamborines, gaites lleoneses, rabeles, pitos, panderos cuadráivos, panderetes , arpes y otros instrumentos tradicionales de menor dificultá, ya inventos.

Investiga de cutio la reforma y meyora de dichos preseos en diseños, afinaciones, pero fai tamién reproducciones basaes en preseos antiguos o tradicionales.

   Nel planu lliterariu tien abondos trabayos espublizaos como Poemes pa nun ser lleidos (Ediciones Filandón en 2008), l’antoloxía poética “Esto non rima” (2012), l’antoloxía d’autores n’asturlleonés (editorial Origami) y n’editorial Suburbia: “Onde la palabra pousa” (2012). Tamién s’autoeditara la obra de teatru: “Sentir, y nun sentir sentire” (2012) y esta nueva antoloxía poética: “Deixando’l cuerpu”.  Fonte: asturnews.com