1/12/14

SUATEA denuncia que los presupuestos 2015 escaecen al profesoráu asturianu

SUATEA denuncia que l'Alministración asturiana ye de les que pior trata al profesoráu en condiciones llaborales y salariales.

   La Conseyería d'Educación prevé la conxelación salarial pal profesoráu nel próximu cursu. Nin siquier vase a abonar la paga extra de 2012 completa, sinón que'l profesoráu funcionariu va recibir una cuarta parte de la mesma en xineru. Pa SUATEA "L'alcuerdu ente PSOE y PP p'aprobar los presupuestos na nuesa comunidá autónoma, con una rebaxa nos impuestos, xenera alarma na comunidá educativa. Si rebaxen los ingresos, quien se van ver perxudicaos van ser ente otros los docentes, que van ver empiorar les sos condiciones llaborales. Y ente ellos, los más perxudicaos van ser los docentes interinos, que van sufrir despidos y precariedá".

   Consideren qu' "estos retayos previstos en Asturies van agravar les intenciones del gobiernu de Rajoy d'amenorgar el gastu públicu n'educación hasta un 3’9% del PIB en 2017(en 2008 llegó a algamar el 5’1% y anguaño tamos nun 4’3%). Esto consiguiráse con más retayos, aumentu de ratios, amenorgamientu de salarios, elevación de la edá de xubilación, despidu de profesoráu interín, rebaxa de la calidá educativa, como marca'l Proyectu de Decretu d'Especialidaes de Secundaria".

   Nesti marcu, "la Conseyería d'Educación convoca una mesa sectorial pal próximu llunes, en víspores de les elecciones sindicales na enseñanza, na que plantega modificar el reglamentu de los Planes d'Evaluación del Profesoráu. Ye una actuación insólita ensin precedentes", y según denuncien "esta burda maniobra realízase pa dar un balón d'osíxenu a los sindicatos allegaos al gobiernu, los sindicatos ANPE y FETE que tán dispuestos a roblar alcuerdos como'l que torgó la estabilidá del colectivu interín o'l qu'atayó la xubida salarial llineal pa tol profesoráu ensin esceición".

   Amás apunten qu' "el nuevu máximu responsable estatal del PSOE, Pedro Sánchez, almite y rectifica el garrafal erru del anterior gobiernu socialista, que modificó l'artículu 135 de la Constitución qu'antepón el pagu del rescate bancariu a Europa frente al gastu públicu n'educación y sanidá.  Sicasí, el gobiernu asturianu persiste nel erru: en cuenta de plantegar una xubida salarial pa tol profesoráu, sigui apostando por un sistema retributivo qu'esclúi explícitamente y ensin remisión posible a más de la cuarta parte del profesoráu asturianu".

   Poro, esixen un cambiu "al gobiernu tantu en materia salarial con una xubida salarial llineal ensin discriminación dalguna, como en condiciones llaborales (amenorgamientu horariu pa tol profesoráu, cambéu del tratamientu de les baxes llaborales, ampliación de plantiyes, oposiciones pa estabilizar al colectivu interín, nuevu alcuerdu d'internos…) y llamenta  fondamente'l tratu de favor que se ta dando a los sindicatos gustantes a l'alministración".  
Fonte: Infoasturies

7 comentarios:

  1. Eso vamos ver bien llueu; ente'l Psoe cola la ayuda de Podemos en cuanto cinque poder. Dientro de bien pocu tiempu va cumplise la siguiente igualdá: mayestros y profesores = indixentes descamisaos. Ta bien claru o precísase una esplicación más complexa?

    ResponderEliminar
  2. El camín de verdá ye la oficialidá /+/

    ResponderEliminar
  3. Seles col psoe porque con podemos vamos andar toos (non solo los enseñantes) en pelota picada y descamisados, antes asustaben al personal con coses rarísimes qu'agora yá nun son, y dempués de gatuñar los votos a los primeres van quedar como gatinos cariñosos que ronronean al calor del llar (o de Facienda)

    ResponderEliminar
  4. El Suatea lúnicu que siempres ta na brecha.

    ResponderEliminar
  5. Eso de los descamisaos recuérdame a Alfonso Guerra nos sos bonos tiempos.

    ResponderEliminar
  6. ¿Y non te alcuerdes del so hermanu Juan "el chorizu" qu'acabó faciéndose l'amu de toles camises del mercáu?, esa memoria...

    ResponderEliminar
  7. Agora yá toos lleven camises y polos de "el cocodrilu", espolletaron sobremarera nel sur.

    ResponderEliminar

Los comentarios tán pendientes de moderación. Espublizaránse lo primero dable.