Los Aguilandeiros de San Xuan de Villapañada van percorrer la parroquia 70 años dempués

Aguilandeiros de San Xuan de Villapañada

   Asturies recupera otra mazcarada. Trátase de Los Aguilandeiros de San Xuan de Villapañada, nel conceyu de Grau, que la mañana del día 28 d’esti mes van percorrer la parroquia depués de 70 años d’ausencia.

   “Los informantes tienen ente 80 y 90 años”, apunta Xosé Antón Fernández ‘Ambás’, ún de les persones que ta detrás d’esti llabor de recuperación de la mazcarada d’una parroquia que destaca por tener un albergue de pelegrinos, yá que perhí pasa’l camín de Santiago, y por ser una zona na que se falaba bron. “Gracies al trabayu de campu que fiximos Ramsés Ilesies y yo, al grupu de baille tradicional Xeitu d’Uviéu y a la parroquia, cola que tuvi una xunta pa involucralos na recuperación, tenemos un montaxe pal 28 d’avientu, Día de los Inocentes”, apuntá’l músicu y investigador. La salida ta prevista pa les 10.30 hores del albergue de San Xuan pa llevar a los amazcaritaos en tractor per tolos llugares de la parroquia –amás de San Xuan, Acebéu, La Llinar y Rozadas– “y va ser espectacular”, promete.

   Nesta primer edición participen trés mozos del pueblu, ente ellos el gaiteru, anque la intención ye que la xente de la zona s’enganche y que l’añu qu’entra tome’l relevu. Munchos nun conocíen la tradición “y tán mui ilusionaos por contar con esta actividá cultural”. “Los personaxes son perinteresantes”, continúa Ambás, “dos parexes de maragatos, que van vistíos de manera colorista y baillen; ún que se llama l’escobón, que va con un cucuruchu y enagües blanques, y lleva un ramu de lloréu. Ésti ye’l que llega a la puerta y pide llicencia: ‘¿barremos o nun barremos?’. Si dan aguilandu, barre; y si barre, baillen los maragatos. Llueu va’l gaiteru, que nun va vistíu, la dama y el galán; tamién el diablu, con una cornamenta de vaca na cabeza y un forcáu, que ye’l del que más s’alcuerden los vieyos –xunto al osu– porque ye’l terror. L’osu va cubiertu enteru de pieles d’oveya, lleva una llueca mui grande detrás y va amarráu con una cadena que lleva un paisanu cola cara de negro, l’amu l’osu, que lu manda baillar o tirase al suelu; y ésti escápase y va pola xente. Depués tán dos personaes que se repiten en munches mazcaraes, la vieya y el vieyu; ella pare, y pare un páxaru… El médicu, que mira si la vieya ta preñada o non; el cura, que bendiz tolo qu’estroza’l diablu; y una cenicera, un home vistíu de muyer con un sacu que va tirando ceniza”.

   Los Aguilandeiros, tres percorrer la parroquia, van aportar a San Xuan, frente a la ilesia, pa facer la función. Depués va celebrase una xinta popular cola que finar una xornada histórica pa San Xuan de Villapañada y pa too Grau, yá qu’ésta ye la única mazcarada del conceyu.    Fonte. Asturies.com