El llabor de Reciella “pa favorecer la tresmisión interxeneracional del asturianu nes edaes más tempranes”, motivu del Pegollu de la XDLA

Camiseta de Reciella

   ‘Reciella. Families pol Asturianu’ va recibir el Pegollu de la XDLA nun añu mui especial, yá que se celebra’l trixésimu aniversariu de los Premios Andrés Solar. El motivu, el so llabor “pa favorecer la tresmisión interxeneracional del asturianu nes edaes más tempranes”. El gallardón negativu, el Madreñazu foi pa la CONCAPA, en concreto pa la so representante n’Asturies, Sandra Ruiz.

   Na tarde d’ayeri diéronse a conocer les persones o entidaes merecedores de los premios que recuerden al poeta xixonés que finara nel 1984 n’accidente de tráficu, unos gallardones qu’esti añu tuvieron la novedá d’ufrir a la ciudadanía la posibilidá de proponer nominaos. El Pegollu, el que correspuende al que “rescamplara pol so llabor en defensa o promoción del asturianu”, foi pa ‘Reciella. Families pol Asturianu’, coleutivu de padres nacíu nel 2012 col enfotu de promocionar l’asturianu nos primeros años de vida de neños y neñes. LaXunta pola Defensa de la Llingua Asturiana (XDLA) valora “el llabor fundamental” de Reciella, con “un proyectu intensu d’actividaes, talleres, cursos, conciertos, xuegos, materiales… Too ello pa favorecer la tresmisión interxeneracional del asturianu nes edaes más tempranes”.

   La otra cara de la moneda, el Madreñazu, destináu a les persones o entidaes que rescamplaren “pol so llabor negativu pa cola llingua asturiana”, foi pa laConfederación Católica Nacional de Padres de Familia y Padres de Alumnos (CONCAPA), en concreto pa la so representante nel país, Sandra Ruiz, “qu’a lo llargo d’esti añu vien atacando sistemáticamente la presencia de la llingua asturiana nel sistema educativu, y avalando y defendiendo les práctiques de determinaos centros educativos pa burllar la llei y nun ufiertar l’asignatura”. Unos motivos nidios que faen a Ruiz bona merecedora “del antipremiu”.

La entrega, el sábadu 20      El Centru de Cultura Antiguu Institutu de Xixón va ser un añu más sede de la entrega de los XXX Premios Andrés Solar, anque nesta ocasión l’actu va pasar a celebrase nel patiu de la instalación. L’actuación musical d’esta edición va correr a cargu de Xulio Ramos y Emilio Ribera.

   Otra manera, la tradicional espicha de la XDLA que se celebra coincidiendo cola entrega de premios pasa esti añu a desendolcase na sidrería El Museo, asitiada nel barriu d’El Llano. El preciu ye de 20 euros y los interesaos n’acudir han de confirmar asistencia nel teléfonu 985.22.95.53 o nel corréu electrónicu info@exunta.org.                   Fonte: asturies.com