San Xuan recibe “ilusionada” la vuelta de los Aguilandeiros a la parroquia

Cartelu de los Aguilandeiros de San Xuan de Villapañada

   La mañana del domingu, Día de los Inocentes, van tornar los Aguilandeiros a percorrer la parroquia de San Xuan. Esta mazcarada llevaba alredor de 70 años ensin celebrase, lo que fai que la parroquia tea “ilusionada” con esta vuelta, asegura Xosé Antón Fernández ‘Ambás’.

   El músicu y investigador ye, xunto con Ramsés Ilesies, responsable del trabayu de campu sobre esti aguilandu tradicional, l’únicu del conceyu de Grau, y ún de los promotores de la vuelva a la vida de la mazcarada, llabor nel que tamién participen el grupu de baille tradicional Xeitu d’Uviéu y la propia parroquia. Los mozos, ente los qu’hai trés del pueblu, van salir a les 10.30 hores del albergue de San Xuan de Villapañada en tractor pa facer un percorríu per tolos llugares de la parroquia –amás de San Xuan, Acebéu, La Llinar y Rozadas–  y finar frente a la ilesia, onde va representase una función. Darréu, va celebrase una xinta popular.

   “La parroquia ta collaborando muncho y creo que va quedar un montaxe mui guapu. La xente del pueblu ta mui ilusionada”, comenta Ambás, que pa la recuperación de los Aguilandeiros tuvo como informantes a persones d’ente 80 y 90 años del llugar. Según esplicó l’investigador a Asturies.com cuando se dio a conocer la iniciativa, la mazcarada ta formada por  personaxes “periteresantes”: “dos parexes de maragatos, que van vistíos de manera colorista y baillen; ún que se llama l’escobón, que va con un cucuruchu y enagües blanques, y lleva un ramu de lloréu. Ésti ye’l que llega a la puerta y pide llicencia: ‘¿barremos o nun barremos?’. Si dan aguilandu, barre; y si barre, baillen los maragatos. Llueu va’l gaiteru, que nun va vistíu, la dama y el galán; tamién el diablu, con una cornamenta de vaca na cabeza y un forcáu, que ye’l del que más s’alcuerden los vieyos –xunto al osu– porque ye’l terror. L’osu va cubiertu enteru de pieles d’oveya, lleva una llueca mui grande detrás y va amarráu con una cadena que lleva un paisanu cola cara de negro, l’amu l’osu, que lu manda baillar o tirase al suelu; y ésti escápase y va pola xente. Depués tán dos personaes que se repiten en munches mazcaraes, la vieya y el vieyu; ella pare, y pare un páxaru… El médicu, que mira si la vieya ta preñada o non; el cura, que bendiz tolo qu’estroza’l diablu; y una cenicera, un home vistíu de muyer con un sacu que va tirando ceniza”.                                                        Fonte: asturies.com