Cartelu del X Liet International
El X Liet International va contar con representación asturiana. La Banda Gaitas El Trasno va desplazase a la ciudá baxa-saxona d’Oldenburg pa participar el vienres día 12 nel festival, viaxe pal que namái cuenten con una ayuda del Conceyu de Cuaña.
Javier Tejedor, direutor de la formación, trató entovía de contautar na mañana de güei, ensin ésitu, col viceconseyeru de Cultura, Alejandro Calvo, cola intención de buscar un apoyu económicu p’afrontar los gastos que-y supón a El Trasno’l desplazamientu de 23 músicos a Oldenburg. Tolos contautos cola alministración asturiana nun tuvieron respuesta positiva hasta la fecha, polo que la banda decidió hai un mes afrontar el viaxe pela so cuenta y mercar los billetes p’Alemaña. Asina, el día 10 partirá dende Cuaña a Bilbo pa garrar un vuelu que lleve a los ganador del VIII Premiu al Meyor Cantar por ‘Volviche’ hasta Minga/München, y d’ehí tomar rumbu hasta Oldenburg, asitiada a 759 quilómetros al norte.
“La organización del Liet ta encantada con que vayamos. Llevamos un tiempu trabayando nesta actuación y, anque la nuesa idea ye pasalo bien, vamos pol premiu”, afirma Tejedor. Nengún representante asturianu consiguió hasta la fecha’l Liet International, festival européu de la canción en llingües minoritaries, y dende El Trasno son conscientes de que la espectacular puesta n’escena d’una banda de gaites va ser una baza al so favor. Tamién el potencial del cantar, ‘Volviche’, con lletra de Xosé Miguel Suárez Fernández ‘Tapia’ y voz del cantante del grupu xixonés Maurizios, Kike Dembinsky. N’Oldenburg, amás, van contar col apoyu de músicos asturianos de referencia, casu de Rubén Bada. “Teníemos que tar ellí. El Liet ye una oportunidá pa llevar la llingua asturiana, nesti casu el gallego-asturiano, lloñe; ye un eventu de gran importancia”, considera’l direutor de la formación con sede en Cuaña.
Hasta l'añu pasáu, el ganador del Premiu al Meyor Cantar tenía como recompensa la presencia nel Liet International, dalgo que camudó nésti tres la suspensión del certame l'añu pasáu por decisión unillateral de la Cullittività Tarrituriale di Corsica cuando yá taben confirmaos el representante frisón, lapón y asturianu, que diba a ser Taranus con ‘Ensin ti’. L'esfuerciu de la organización del Liet consiguió recuperar el festival esti 2014 tres un periodu d'incertidume.
Diez participantes
El teatru Kulturetage va ser el vienres día 12 la sede del X Liet International. Nesta ocasión van participar diez formaciones representando a diez llingües minoritaries: Banda Gaitas El Trasno (gallego-asturiano, Asturies), Adnoz (bretón, Breizh), Aila-Duo (sami, Laponia); Bandalheira (mindericu, Portugal), Bruno Rummler (frisiu, Fryslân), Forefingers Up!-A New Balentia’s Joint (sardu, Sardigna), Marina Sadova (mari, República de Mari-El); Martina Iori (lladín, Trentino-Sudtirol), Willie Campbell (gaélicu, Alba) y los llocales The Paintbox (baxosaxón). Fonte: asturies.com
Fenomenal. Pero que actúen colos tambores típicos asturianos qre ye más auténticu y natural con sabor astur, sinón van parecer escoceses o anglosaxones.
ResponderEliminarManfredo, son los tambores de guerra como nes pelis d'indios qu'amás de faer enforma y horrorosu ruiu (¡hai los nuesos tambores asturianos de les romeríes de siempres!) asusten y acoroxen al personal, todo bien inglés. ¿Pero tamién podría ser que constituyeran un bon negociu en dalgún sentíu o pa dalgunos? ...a pensar díxose.
ResponderEliminarPerbona suerte al grupu El Trasno para que se traigan para p'Asturies el premiu al que aspiren porque lo merecen anque sía coles criticaes caxes enormes con soníu a maera inglés seco.
ResponderEliminar