La venta de llibros nel mercáu interior sigue cayendo. Mientres nel 2011 facturóse 2.772,34 millones d'euros, nel primer semestre de 2012 la cayida yá s'avera al 10%, según anunció esti martes Javier Cortes, presidente de la Federación de Gremios d'Editores d'España.
Les esportaciones del seutor del llibru crecieron un 5,38% nel 2011 y aporte 262,31 millones a la balanza comercial española.
Esti descensu de la facturación vien motiváu pola crisis, la implantación del mundu dixital y la mentalidá de la cultura de "too de baldre", según esplicó Cortes, mientres la presentación del Estudiu de Comerciu Interior y Esterior del Llibru n'España.
P'aliviar esta cayida, Cortés reclama de "manera urxente" una nueva llei de propiedá intelectual y una nueva fiscalidá (IVA) del llibru en tolos sos formatos.
"Xubir l'IVA de los llibros, castigaría más al seutor. Económicamente ye una midida poco rentable y nun se xustifica dende nengún puntu de vista", denunció'l presidente de la FGEE.
No referente a los primeros efeutos de la Llei Sinde nel zarru de páxines webs, Cortes señaló qu'estes midíes "lleguen tarde". "Pasamos de la impunidá más absoluta a qu'exista un guardia de circulación", aliega Cortés.
El más afectáu por esta cayida nel sector editorial ye'l llibru de ficción p'adultos y los responsables de la FGEE nun descarten que nel 2012 puean zarrar delles editoriales, grandes y pequeñes, por culpa d'estes cifres.
Preguntáu polos contautos col Gobiernu p'arreglar los problemes del sector del Llibru, los editores afirmen que yá caltuvieron dalgún alcuentru col Secretariu d'Estáu de Cultura, José María Lassalle, pero precisen que tovía nun tuvieron "nenguna meyora" al respeuto.
COMERCIU ESTERIOR SALVA AL SEUTOR
Sicasí, el seutor esterior del llibru español sigue recuperando la sienda de crecimientu y ofrez datos positivos. Asina mientres 2011, les esportaciones del seutor del llibru español (qu'inclúi a los seutores editorial y gráficu) algamaron los 482,44 millones d'euros, lo que supón una subida del 5,38% sobre l'exerciciu 2010 (670,59 millones de dólares). Les importaciones del seutor del llibru subieron a 220,17 millones d'euros.
Polo que l'aportación positiva a la balanza comercial española del seutor del llibru foi de 262,31 millones d'euros frente a los 233,21 millones rexistraos nel 2010, lo que supón una xubida del 11%.
Nesti sen, José María Ávila sorraya la importancia del comerciu esterior del llibru, "una de les poques partíes qu'entreguen una cifra positiva a la balanza de pagos. Y los réditos pal país son mui importantes y nun tán valoraos polos departamentos económicos d'esti país", alega Ávila.
La Xunión Europea sigue siendo'l principal destín de les esportaciones españoles del seutor con 304,90 millones d'euros, con una xubida del 13,28%. Dientro d'Europa, Francia y Reinu Xuníu ocupen los primeros puestos de la esportación del seutor, con 108,3 y 81,9 millones d'euros de facturación respeutivamente.
América caltiénse como segundu destín de les ventes al esterior del seutor del llibru con 167,97 millones d'euros, a pesar de reducise un 4,77% al respeuto del 2010. Hai que señalar que les esportaciones a América son, fundamentalmente, llibros. N'Europa, hai una participación mayoritaria de los fascículos.
Méxicu, Arxentina y Chile son los países d'América nos que les empreses españoles vendieron más. Pesie a que nel primeru rexistróse una lixera cayida con al respeutive del 2010. En Méxicu, les empreses vendieron 47,21 millones d'euros frente a los 47,76 del añu anterior. Pela so parte, n'Arxentina facturó un total de 28,16 millones d'euros frente a los 24,73 de 2010, pese a que'l zarru, nel mes de setiembre, de l'Aduana torgó una progresión mayor de l'actividá esportadora.
MÁS LLIBROS LLETRÓNICOS PERO FACTURACIÓN REDUCIDA
No referente a la incidencia del llibru lletrónicu na facturación del sector del llibru n'España sigue siendo mui reducida. Nel 2011, les ventes de títulos en formatu dixital algamaron los 72,60 millones d'euros, lo que representa un 3% más que nel añu 2010. La xubida con respeuto del 2009, primer añu nel que s'incluyó los llibros dixitales nesti estudiu, foi del 41,6%. Esta cifra de facturación representa'l 2,8% de la facturación total del seutor.
Sicasí, dende FGEE precisen que les editoriales españoles realizaron un "importante esfuerzu" p'ampliar de manera considerable la so ufierta de títulos nesti formatu. Ello ye que mientres l'añu 2011, el númberu de títulos dixitales editaos xubió a 40.328, un 243,3% más que nel añu 2010 (576,6% más con al respeuto del 2009). Coles mesmes, dixitalizáronse 81.170 obres de fondu de catálogu.
Por materies, los llibros y bases de datos xurídiques suponen el 52,9% de la facturación (38,406 millones d'euros), mientres que los llibros de Lliteratura y Lliteratura Infantil y Xuvenil representen yá'l 18,8% de la facturación (13.602 millones d'euros).
Al respeuto de la facturación de los llibros en formatu bolsu aumentó un 4,8% al respeuto del 2010, hasta quedar nos 185,13 millones d'euros. El númberu de títulos editaos baxó nun 10,4%, hasta algamar los 5.376, al contrario que'l númberu d'exemplares editaos, que s'eleva nun 9,5% (35,72 millones d'euros).
Fonte: Europa Press
¡Ai! la crisis qu'a toes partes llega.
ResponderEliminarYe que nun hai perres,fía.
ResponderEliminarSi nun hai panchón toos entran en discutiniu, asina pasa colos llibros.
ResponderEliminarPa lleer nun faen falta munches perres sinón amor a la llectura y a les lletres.
ResponderEliminarYá van venir tiempos meyores, home.
ResponderEliminarVan venir pero van tardar enforma en llegar y mentanto hai que lleer enforma, cada vegada más y sobremanera los neños nos colexos y nens sos cases cola ayuda básica ya ineljudible de los sos pás y/o families.
ResponderEliminar