10/7/12

Iniciativa pol Asturianu afala a les empreses a usar l'asturianu




Iniciativa pol Asturianu afita que “l'asturianu ye una ventaya a la hora d'anunciase; «Aforra les perres pa les vacaciones, la cesta la compra regálatela Caudalia» o «Teas onde teas siempres ye bon momentu pa tornar a casa» son namás dos exemplos de grandes empreses que se sumen a les permunches iniciatives d'otros negocios asturianos”.

Dende l’asociación recuerden que “foi primero Tierra Astur, una de les marques de "Quesos del Principado de Asturias. S.L", quien entamó una campaña billingüe xugando cola cercanía del idioma a la hora d'afalagar el calter familiar de los sos llocales y los sos clientes y agora Caudalia, un centru comercial allugáu en Santuyano (Mieres), el que fai usu de la llingua d'Asturies pa una campaña de promoción”.

Iniciativa pol Asturianu, asociación en defensa del idioma, quier destacar la importancia de que n'Asturies el so comerciu “emplegue l'asturianu con naturalidá, dalgo que per otra parte tendría que ser habitual como asocede n'otres comunidaes españoles, ya que'l papel de la normalización ye una responsabilidá individual y coleutiva, tanto de les entidaes públiques y privaes”.

Asimesmo Iniciativa pol Asturianu da anuncia que “vien contautando y firmando convenios con delles empreses pa la inclusión del idioma n'ámbitos como la toponimia, la páxina web o l'etiquetaxe. Ello ye que la organización quier afalar a les empreses a apostar pola llingua en tolos casos, entendiendo con estos exemplos que l'asturianu nunca nun ye un pilancu o un impedimentu sinón una fonte de riqueza, un incentivu económicu y una ventaya qu'ofrez cercanía y familiaridá”.

Fonte: Asturies.com

4 comentarios:

  1. Esti sí que ye un bon exemplu pa munches empreses y grupos de trabayu.

    ResponderEliminar
  2. Son munchos los que yá siguen esta acertada pauta

    ResponderEliminar
  3. S'ha d'aconseguir que una empresa de cada sector aposti per l'asturià. Quan hi ha competència i el consumidor pot escollir, que una empresa es desmarqui amb la llengua acostuma a arrossegar la resta.

    ResponderEliminar
  4. Pero hai que ver l'asturianu qu'usen na carta de Tierra Astur. Rincha lo güeyos.Unes clases d'asturianu pal que diseña les cartes dirien bien.

    ResponderEliminar

Los comentarios tán pendientes de moderación. Espublizaránse lo primero dable.