La Casa de les Llingües de la Universidá d'Uviéu va impartir, ente ochobre del 2012 y mayu del 2013, dos cursos d'asturianu de nivel A1 de 90 hores. Los cursos, con 20 places caún, van impartise nel Campus del Milán d'Uviéu –llunes y miércoles, de 17.30 a 19 hores– y na Cátedra Xovellanos de Xixón –martes y xueves, de 19.30 a 21 hores–. La matrícula, que tien un costu de 330 euros, ta abierta a toles persones con 17 años cumplíos y va poder formalizase hasta'l 10 de setiembre.
Ente los oxetivos del cursu, atópase que los alumnos puedan intervenir, responder y cooperar n'asturianu, de manera cenciella, nos contextos comunicativos más habituales; tamién que sían quién a captar el sentíu global de mensaxes orales breves y comprender de manera global testos escritos. Espérase que, al acabar les clases, los escolinos produzan mensaxes breves y coherentes tanto orales como escritos y que manexen el léxicu y espresiones más afayadices en situaciones corrientes.
Al tener como fin que l'alumnáu pueda facer un usu efectivu del idioma, les actividaes van orientase de manera tala que los estudiantes tengan qu'enfrentase a situaciones de comunicación reales, onde intervengan tanto la comprensión y producción de mensaxes como la interacción y mediación col entornu. Nos casos onde sía útil, va recurrise a esplicaciones teóriques de cuestiones gramaticales, anque nesti primer nivel va prestase más atención a l'adquisición de léxicu, a la pronunciación correcta del asturianu y a afitar una espresión oral amañosa.
Fonte: Les Noticies
La enseñanza del asturianu ta vergoñante, y non polos profesores, siguimos como hai 25 años, nun se da nin un pasu, y eso que garramos les competencies n'educación. Por eso tolo que se llogre ye bien recibíu.
ResponderEliminarYe la matrícula pal nivel A1 y val 330 euros.
ResponderEliminarYe otro pasu alantre pola pervivencia futura de la llingu, un 10 a la Universidá.
ResponderEliminar