Somos Avilés solicita qu’en tola cartelería dependiente del Conceyu s’emplegue l’asturianu

por Pablo R. Guardado

El Plenu del xueves del Conceyu d’Avilés va aldericar un ruegu de Somos Avilés p’avanzar hacia la normalización del idioma. L’agrupación d’eleutores solicita al gobiernu municipal qu’en tolos elementos de comunicación s’use la llingua asturiana.

“A falta de l’aprobación definitiva de les Ordenances Municipales d’Usu del Asturianu y/o d’un Plan Municipal de Normalización Llingüística que regule les actuaciones del Conceyu d’Avilés nesti tema, rogamos que nes señalizaciones, cartelería, paneles y demás elementos de comunicación y contactu cola ciudadanía dependientes d’esti ayuntamientu se tenga en cuenta la presencia de la llingua asturiana, apaeciendo na rotulación de los mesmos, ensin discriminación o minusvaloración nenguna”, apunta’l documentu rexistráu por Somos Avilés. La candidatura de xunidá popular entiende que “l’asturianu non sólo val pa falar del asturianu o pa emplegalu namás cuando’l tema tenga dalgo que ver con él”, sinón qu’ha d’usase en cualquier tipu de comunicación que faiga’l Conceyu.

“De mui poco val entamar actividaes aislaes (les más de les veces de calter folclóricu, testimonial y/o simbólicu), cuando la situación sociollingüística d’Avilés requier, si de verdá se quier frenar el procesu de sustitución llingüística, d’acciones muncho más ambicioses, planificaes y efectives”, apunten dende Somos Avilés, que denuncia tamién la tardanza na aprobación definitiva de la Ordenanza d’Usu del Asturianu, aprobada pol Plenu n’abril. “L’equipu de gobiernu tovía nun presentó nin un borrador de la mesmu”, critiquen.

Otres situaciones de marxinación del idioma

Nun son les úniques situaciones con respeuto a la llingua asturina que descontenta a Somos Avilés, que cita tamién “la discriminación que supón el que la matrícula d’asturianu nel programa denomináu Aules Populares d’Avilés (AUPA) seya la más cara de tolos cursos d’idiomes que s’ufierten (147 euros frente a 110)”, la baxada na partida de los presupuestos municipales dedicaos al idioma o l’ausencia d’una política llingüística “mínimamente seria”, polo que solicita al gobiernu “polo menos un poquiñín de voluntá y de respetu”.

Fonte: Asturies.com