La importancia de los Servicios de Normalización Llingüística

Los Servicios de Normalización Llingúistica (SNL) creaos na so mayor parte na primer década del sieglu XXI, con más de venti años de retrasu, son una ferramienta vital pal oxetivu de normalizar l'usu del asturianu. Los Conceyos son l'alministración que ta más cerca de la ciudadanía; poro, estos SNL dependientes de les entidaes llocales son la forma más eficiente y efeutiva de tar cerca de ciudadanos, empreses y asociaciones, asesorando y ayudando nos pasos pa poner en marcha aiciones que normalicen l'idioma.

Dempués d'estos años d'actividá ye positivo l'afitamientu que tienen yá los servicios de dellos conceyos, onde tienen presupuestu propiu dientro de les cuentes llocales, personal fixu y más o menos suficiente, amás d'un llabor continuáu. Sicasí, esto ye la escepción. La mayor parte los SNL malviven basaos nuna convocatoria añal de sovenciones de la Conseyería de Cultura, ensin que'l Conceyu correspondiente apueste con partíes presupuestaries significatives, con personal precarizáu, con xornaes parciales y ensin medios nin oxetivos ambiciosos marcaos dende la voluntá política.

El modelu al traviés del que se financien la mayor parte d'estos SNL ye una de les cuestiones pendientes y que'l Conseyeru de Cultura, Genaro Alonso, tien la oportunidá de correxir agora. L'actual modelu de convocatoria de sovenciones demostróse pocu operativu, nun xenera estabilidá nos servicios.

Pa correxir esta situación hai dos víes complementaries. Per un llau, la Direición Xeneral de Planificación Llingüística del Gobiernu d'Asturies tien de convertir eses sovenciones en convenios de collaboración colos Conceyos, que dean estabilidá y acaben colos pieslles intermitentes qu'asoceden en munchos de los SNL cada añu, dexando dellos meses ensin serviciu a la ciudadanía. D'otra banda, los Conceyos tienen de responsabilizase direutamente de la inversión que suponen los SNL, demostrando asina'l so verdaderu compromisu cola normalización del idioma nel territoriu propiu.

Nun val dicir que se-y da sofitu al procesu de normalización nel programa de gobiernu y dexar les midíes en manes de que llegue o nun llegue una sovención del gobiernu autonómicu, ensin implicar a la propia alministración que da'l serviciu na so financiación. Ye la hora d'asumir estos servicios como parte de la cadarma de los Conceyos, con toles consecuencies y con un compromisu verdaderu.

Defender la continuidá d'estos servicios de normalización ha ser una de les nueses prioridaes. Dende Iniciativa pol Asturianu vamos siguir trabayando nel control sobre la situación de los SNL, reclamando l'apertura de servicios nos conceyos y mancomunidaes onde nun esistan, la creación y/o'l cumplimientu d'ordenances y planes de normalización que xeneren bases de trabayu pa estos SNL y siguiendo mui de cerca la implicación de cada Conceyu col so serviciu.

Fonte: Iniciativa pol Asturianu