Iniciativa pol Asturianu denuncia’l pieslle del Serviciu de Normalización Llingüística de Llaviana

Iniciativa pol Asturianu tuvo noticia de que'l Conceyu de Llaviana tien peslláu'l so 
Serviciu de Normalización Llingüística dende va tiempu, ensin qu'heba noticies de 
si va producise la so reapertura y cuándo podría volver a l'actividá. Esiximos al equipu
 de gobiernu llocal que pongan los medios precisos pa que'l llabor del SNL vuelva a 
ponese en marcha y pa que tenga los recursos necesarios pal so llabor efeutivu. 

Amás el Conceyu de Llaviana tien paralizáu’l proyeutu d’ordenanza de normalización del asturianu que cunta col  acuerdu de tolos partíos y que se caltién a la espera de la decisión del grupu de gobiernu depués de más de diez meses de la so presentación en rexistru.  

Por ello, Iniciativa pol Asturianu quier amosar el so descontentu con esta llamentable situación de despreocupación pa col nuesu idioma. Puesto que’l Conceyu de Llaviana, non solo nun dexa llevar alantre’l trabayu, sinón qu’incumple los compromisos eleutorales no tocante a la normalización.

Poro, Iniciativa pol Asturianu solicita que se reinicie l’actividá d’un serviciu que taba faciendo un llabor importante nel Conceyu, asina como mayor implicación per parte del alcalde de Llaviana Adrián Barbón. La entidá reafirma asina’l so compromisu como la so collaboración pa iguar esta situación qu’afeuta direutamente a los drechos de toos y toes.

Fonte: Iniciativa pol Asturianu