El Conceyu d'Avilés llevará a Plenu l'aprobación definitiva de les ordenances d’usu del asturianu n'abril o mayu

• por Pablo R. Guardado

Somos Avilés treslladó un ruegu al gobiernu municipal del PSOE pal emplegu de la llingua asturiana en tola cartelería y avanzar asina nel procesu de normalización. La conceyala de Promoción Social y Cultura, Yolanda Alonso, afirmó que n’abril o mayu va llevar por fin a Plenu l'aprobación definitiva de les ordenances d’usu del asturianu.

Na sesión plenaria celebrada ayeri l’edil Xune Elipe encargóse de treslladar el ruegu rexistráu por Somos Avilés pa que “nes señalizaciones, cartelería, paneles y demás elementos de comunicación y contactu cola ciudadanía dependientes d’esti ayuntamientu se tenga en cuenta la presencia de la llingua asturiana, apaeciendo na rotulación de los mesmos, ensin discriminación o minusvaloración nenguna”. Tres facer llectura del mesmu y poner exemplos de tresversalidá del usu del idioma, destacando la rotulación progresiva bilingüe de los vehículos municipales n’Uviéu, aseguró que “nun pidimos nada que cueste un euru más nin nada que nun se fixere enantes –editar un cartelu n’asturianu cuesta lo mesmo qu’ún en castellanu, apuntara–. Ye sólo una cuestión de voluntá”.

“Nun esperamos del PSOE, nin n’Avilés nin munchísimo menos n’Asturies, un plan llingüísticu mínimamente seriu. Namái pidimos un poco de voluntá y un poco de respetu”, añadió. Na so réplica, Alonso respondió que “voluntá política, tola del mundu; sí qu’hai una apuesta decidida ”, poniendo d’exemplu “un recursu permanente, la Estaya de la Llingua d’Avilés –de la que previamente Elipe defendiera’l so llabor, encabezáu pola so responsable Montserrat Machicado– cuando muncho de los conceyos de la redolada namái tienen personal cuando tienen subvención”.

El momentu más tensu del alderique llegó cuando, tres adelantar un programa de Cultura col Serviciu d’Educación pa trabayar l’asturianu con neños y neñes de 0 a 3 años, la tamién responsable de Promoción Social apuntó que “la señalética sí cuesta dinero”, a lo qu’Elipe respondió qu’eso nun yera lo que se taba tratando. Al tomar la pallabra otra vuelta, l’edil de Somos Avilés criticó “l’usu folclóricu, meramente testimonial y simbólicu, pero non normalizáu” del Conceyu. “Aiciones de tipu aisllaes, como les entamaes pola La Factoría, que tán xenial y tienen la respuesta de públicu que tienen, son d’efectividá reducida si nun lleven apareyaes otres que fidelicen l’apreciu pol asturianu y el so emplegu real, lo que s’algama con una política tresversal de normalización”.

Cuasi un añu de retrasu

Na so intervención cabera, Alonso esplicó’l porqué del mayor preciu de los cursos d’asturianu nes Aules Populares d’Avilés con respeuto a otros idiomes (147,50 euros frente a 110) criticáu por Somos –“págase per hores y los d’asturianu tienen más duración” –, y aseguró que “tamos trabayando na ordenanza d’asturianu y la idea ye llevala al Plenu del mes d’abril o mes de mayu. Dalgunes vegaes trabayamos”.

Nesi sen, Elipe denunciara enantes el retrasu de casi un añu na aprobación definitiva de la ordenanza d’usu del asturianu, que tuvo’l preste del Plenu d’abril del 2016, “pese a qu’intentamos quita-yos trabayu a los funcionarios ufiertando una propuesta d’ordenances adaptaes a la realidad sociollingüística d’esti conceyu”.

Fonte: Asturies.com