Ñaz un nueu proyeutu musical nel que los ritmos de raigañu más prietu xúnense a la nuesa llingua nes voces del Coru de Muyeres de San Esteban.
Con una puesta n’escena atrautiva y mui dinámica, xunía a una calidá musical escelente, estos conciertos son una propuesta interesante ya anovadora ideal que, sicasí, entá va facese esperar un poco, ya que nun tan confirmaes les feches de los primeros conciertos, seique dalgunes de les canciones –comu’l perconocíu “Oh happy day” o “I’l fly away” yá se colaron nel repertoriu del coru nes sos caberes actuaciones.
Rebeca Velasco Rodríguez, direutora del Coru de Muyeres de San Esteban, desplicó l´orixe d’esta idega “A muncha xente gusta-y la música góspel, mesmo ensin pescanciar o compartir el so conteníu. Nosotres adautemos les lletres de manera que, calteniendo la esencia de la música góspel, la faigamos más cercana a la nuesa cultura. Son cancios espirituales asturianos” . Ella ye la responsable d’esta prestosa idega na que, comu’l so nome indica, adáutense dalgunes de les canciones góspel más conocíes, tornándoles a la nuesa llingua y dándo-yos un toque propiu.
Arriendes de dirixir a les Muyeres de San Esteban, l´artífice d´esti proyeutu ye tamién la direutora d’otros cinco coros, compaxinando esta llabor cola de direutora na Escuela Municipal de Música de Grau y cola organización d’eventos y talleres musicales per tola xeografía asturiana, -como la Selmana del Jazz de Candás, los talleres “Proyectarte”, o´l festival “Rockandguajes” pente munchos otros-
La so trayeutoria destaca pola so costante búsqueda de l’anovación, ensin descuriar enxamás la integración de la cultura asturiana con estremaos estilos musicales, polo que vien algamando dellos premios.
Fonte: Infoasturies
Cenciellamente magníficu.
ResponderEliminar