Esti martes, 21 de febreru, ye’l Día Internacional de la Llingua Materna. Asturies vive un añu más esta xornada con actividaes per tol país, sobre manera nes escueles y institutos, pero cola falta d’oficialidá del asturianu y gallego-asturiano de fondu.
La Organización de les Naciones Xuníes pa la Educación, la Ciencia y la Cultura (UNESCO, poles sos sigles n’inglés) escoyó’l 21 de febreru como fecha pa celebrar esta xornada en reconocencia a los trés mozos que morrieron en Bangladesh nel 1952 polos disparos del exércitu paquistaní –qu’ocupaba’l país– nuna manifestación en Dhaka pola defensa de la llingua bengalí. El primer Día Internacional de la Llingua Materna foi nel 2000 y, dende entós, tolos años s’aprovecha esta fecha pa recordar la importancia de preservar toles llingües al ser éstes un patrimoniu común de la humanidá.
Nesta ocasión, el tema escoyíu pol organismu de Naciones Xuníes ye ‘Hacia un futuru sostenible al traviés de la educación multillingüe’: “Les llingües llocales, sobre manera les minoritaries y indíxenes, trensmiten cultures, valores y conocimientos tradicionales, desempeñando asina un papel importante na promoción de los futuros sostenibles”. Pela so parte, Irina Bokova, direutora xeneral de la UNESCO, fai un llamamientu “pa que’l potencial de la educación plurillingüe se reconoza nel mundu enteru, nos sistemes educativos y alministrativos, nes espresiones culturales y nos medios de comunicación, nel ciberespaciu y nos intercambios comerciales”.
Actividaes institucionales en Mieres y Siero
La Conseyería d'Educación y Cultura, al traviés de la Direición Xeneral de Planificación Llingüística y Normalización entama dos actos institucionales de celebración del Día Internacional de la Llingua Materna “pa promover la diversidá cultural y llingüística del Principáu d'Asturies”. “El motivu central de la celebración ye la visibilización del asturianu y del gallego-asturiano como llingua materna y como una ayalga cultural propia, qu’aumenta la calidá de la educación a tolos niveles col usu, ameyorando les capacidaes de comprensión y creatividá, al empar que favorez l'arriquecimientu de les relaciones sociales y de les estratexes comunicatives”, espliquen nuna nota.
Na mañana del güei, xornada previa al Día Internacional de la Llingua Materna, tolos escolinos y escolines de Secundaria de Mieres participaron nun actu nel auditoriu de la Casa de Cultura Teodoro Cuesta nel qu’actuó Anabel Santiago. Mentes, mañana, a les 11.30 hores, los de Primaria y infantil de Siero van disfrutar de la representación de ‘Grana de cardamomu’, del grupu de teatru El Callejón del Gato, nel Auditoriu Municipal de La Pola.
Llectura d’un manifiestu en tolos centros
Coincidiendo con esta xornada, en tolos centros educativos del país va lleese un manifiestu, mesmo que testos n'asturianu y en gallego-asturiano. D’igual forma, yá de manera individual, la gran mayoría escueles y institutos van entamar actividaes venceyaes cola llingua materna.
Ún de los centros que más enfotu van poner nesta celebración ye l’IES García de la Concha, de Villaviciosa, cola intención “de concienciar a los nuesos alumnos y alumnes sobre la necesidá de caltener y usar l´asturianu na vida cotidiana”. Asina, en primer llugar va presentase’l Calendariu de la Güerta, editáu pol Serviciu de Normalización Llingüística de la ‘Comarca de la Sidra’, al alumnáu participante nel proyectu Güertos Escolares, que va poder consultar esta ferramienta a la hora de trabayar nel güertu del institutu.
Darréu, previu pasu pel güertu, va inaugurase la esposición de cartelos sobre la ‘Historia de la Llingüa Asturiana’, facilitada pol SNL de la mancomunidá, pa siguir con una charra sobre la historia del rock n’asturianu a cargu de Xandru Vega, gaiteru de Skama la Rede, al que va asistir tol alumnáu de primeru de Bachilleratu y de terceru y cuartu de la ESO. Va poner el ramu a la xornada la banda maliayesa Melandru con una actuación.
Fonte: Asturies.com
Celebróse perbién el Día Internacional de la Llingua Materna.
ResponderEliminar