10/2/17

Alonso anuncia la creación del Premiu de Teatru Profesional n’Asturianu


El conseyeru d’Educación y Cultura, Genaro Alonso, anunció na Xunta Xeneral la creación del Premiu de Teatru Profesional n’Asturianu. La Direición Xeneral de Planificación Llingüística y Normalización ta trabayando na so convocatoria próxima.
En respuesta a una entruga plantegada nel Plenu pol diputáu popular Pedro de Rueda sobre qué midíes piensa adoptar el Gobiernu pa impulsar el teatru en xeneral y la industria teatral, en particular, Alonso afirmó que’l compromisu del Executivu col teatru “ye indiscutible”, pa lo que citó les ayudes económiques direutes al Circuitu de les Artes Escéniques, la preocupación por renovalu y reforzalu, y el plantegamientu a iniciatives nueves en torno al sector. Asina, cuantificó en 588.109 euros les ayudes al teatru asturianu al traviés d’un programa que implica a 25 conceyos, 45 compañíes y cerca de 300 representaciones.
“L’impulsu económicu al circuitu nun ye l’únicu que recibe’l teatru asturianu dende’l Gobiernu”, añadió citando los 223.420 euros recibíos pol sector nel 2016 al traviés de les llinies de concurrencia competitiva pa producción, movilidá y proyeutos d’interés nacional, l’Axenda Didáutica, les ayudes a la producción en residencia o la contratación d’espectáculos dientro del programa ‘Vamos’ de la Llaboral Ciudá de la Cultura. Una llista a la que pronto va sumase’l Premiu de Teatru Profesional n’Asturianu, nel que ta trabayando la Direición Xeneral de Planificación Llingüística y Normalización.
No que respeuta a la llingua asturiana, el conseyeru tamién se refirió a l’Axenda Escolar 2017, anguaño en tramitación, qu’inclúi la programación de representaciones teatrales y cuentacuentos nos centros educativos pa los escolinos y escolines de Llingua Asturiana y Gallego-Asturiano.
Semeya obra d'Armando Álvarez.

Fonte: Asturies.com

12 comentarios:

  1. L'oficialidá Alonso y dempués el premiu de teatru.

    ResponderEliminar
  2. Agora pieslla'l Serviciu de Normalización Llingüística de Llaviana(de Llaviana Genaro ¡de Llaviana!)y pregunto al señor Alonso si nun puede faer daqué por que non zarru, daqué como plantegar la oficialidá del asturianu d'una puñetera vegada que ye lo esencial del casu en cuenta de dar premios, que ta bien, pero primeru lo urxente y pernecesariu ¿non?

    ResponderEliminar
  3. Siguimos coles cortines de fumu ye dicir col xuegu del despiste pa nun plantegar y encarar el necesariu y urxente problema de la falta d'oficialidá del asturianu. Ye bien guapu y curiosu poner premios pa una llingua que nun queremos que sía oficial ¿eh, obediente burócrata don Genaro Alonso? una pena.

    ResponderEliminar
  4. Esti nuevu premiu ye bien interesante y dignu d'aplausu anque ye bien ciertu que sobren violinistes nel teyáu. Hai que crear una sala de conciertos onde poder tocar como se debe: la oficialidá de la Llingua Asturiana porque "obres son amores y non bones razones"

    ResponderEliminar
  5. Genarín a otru perru con esi güesu tan guapu, tan relluciente, y con estolaxe. Oficialidá yá.

    ResponderEliminar
  6. Les xentes del teatru apreciar no que vale. Bien fechu.

    ResponderEliminar
  7. Esti premiu pal Teatru Profesional n'Asturianu ye otru pasu alderique la oficialidá, home. Genaro Alonso fai lo que puede y déxen-y el so xefes y menos ye ná.

    ResponderEliminar
  8. Amás ye'l partíu'l que manda, el qu'autoriza, y el qu'ordena, non el señor Alonso.

    ResponderEliminar
  9. Oficialidá sí. En cuantes a esti premiu podía dedicase a tolos grupos de teatru n'asturianu, non solo a los profesionales.

    ResponderEliminar
  10. El desertores de la tiza, el mio apreciáu Tino, suelen salir asina, obedientes al partíu pero nefastos nel restu y Genaro Alonso nun ye una esceición.

    ResponderEliminar

Los comentarios tán pendientes de moderación. Espublizaránse lo primero dable.