"Del conceyu de Bimenes tien que salir un impulsu nuevu p’asegurar el futuru de la llingua"

• 
  

Asturies.com ufre'l manifiestu que 'Conceyos pola Oficialidá' lleó'l sábadu tres la declaración d'oficialidá de Bimenes.

Coincidiendo cola XX Fiesta de la Oficialidá, al meudía celebróse en Martimporra'l Plenu municipal nel que se declaraba por unanimidá de los conceyales de les cuatro formaciones con representación (PAS, IX, Xente Yerbato y PSOE) la oficialidá del asturianu nes llendes de Bimenes. Darréu, l'alcalde Aitor García Corte y el de Miranda de l Douro, Artur Nunes, fixeron un discursu institucional enantes de dar pasu al manifiestu de 'Conceyos pola Oficialidá', iniciativa impulsada pol propiu Ayuntamientu de Bimenes y la Xunta pola Defensa de la Llingua Asturiana qu'axunta a más de cien ediles de too signu políticu.

Equí pues lleer dichu manifiestu completu:

Xente de Bimenes, xente d’Asturies y d’otres partes qu’alleguestis güei hasta equí, amigos y amigues de Miranda de’l Douro:

Esti añu 2016 empezaba n’Asturies con mui males noticies pa la recuperación llingüística: recordái namás el vetu del usu de la llingua asturiana na Comisión de la Xunta Xeneral precisamente creada pal estudiu sobre réxime, protección y promoción del asturianu, o l’anulación del Plan de Normalización Llingüística de Carreño, o les torgues a la recuperación de la toponimia tradicional en dellos otros conceyos. Per otru llau, l’encadenamientu de periodos electorales estatales amenazaba con dexar el conflictu llingüísticu en segundu planu.

Pensábemos que dende los conceyos yera obligao salir a defendese d’estes agresiones acorpando nuna reacción decidida y colectiva: pensábemos que l’asturianu y el gallego-asturianu tienen de ser tresversales nes polítiques municipales porque son un instrumentu de rellación diaria, porque son un patrimoniu cultural, porque proporcionen unos derechos, porque formen parte de la identidá de los conceyos… Y tamién porque dende lo local pue dáse-y puxu a decisiones polítiques d’otru nivel, de protección, de promoción o de reconocimientu oficial de la llingua.

Asina nació Conceyos pola Oficialidá: la Xunta pola defensa de la Llingua Asturiana y l’equipu de gobiernu del Conceyu de Bimenes ficieron un llamamientu pa da-y un emburrión al espíritu de protección del patrimoniu llingüísticu d’Asturies y de defensa de los derechos llingüísticos de los y les falantes d’asturianu y de gallego-asturianu y en poco más d’un mes yá llegamos a sumar a la iniciativa a más d’un cientu de conceyales de la metá de los conceyos d’Asturies. Xente que se presentó a les elecciones municipales pasaes dientro de candidatures qu’algamaron en xunto más de 130.000 votos d’electores d’Asturies, y ente los que s’alcuentren persones de cuasi toles formaciones polítiques. Por qué nun dicilo: de toes menos d’una.

El nuestru cortexu na manifestación pola oficialidá del Día de les Lletres amosó una imaxen curiosa tanto pola presencia de cargos públicos como pola diversidá ideolóxica y lo variao de la so procedencia xeográfica.  Hebo xente de L.lena a Xixón, d’A Veiga a Peñamellera… y vimos ellí conceyales de tolos partíos, por más que dalgunos, yá sabéis cuálos, presionaren a la so militancia pa que nun s’identificara cola pegatina. Aquel día volvimos demostrar que la oficialidá del asturianu y del gallego-asturianu nun ye una reclamación partidista nin d’una minoría elitista.

Esa pancarta de Conceyos pola Oficialidá, la mesma que llevemos na manifestación, nun paró de viaxar per Asturies dende entós. Pudistis vela colingada nel corredor de dellos conceyos o presentada por conceyales y militantes de la Xunta pola Defensa de la Llingua Asturiana n’otros onde nun nos dexaron ponela onde por dignidá-y correspuende: nel balcón de les cases del conceyu, onde s’amuesen tantes reivindicaciones xustes de la ciudadanía.

Y con ella llegamos güei equí, a Bimenes, pa ratificanos públicamente na demanda de la oficialidá pal asturianu y pal gallego-asturianu. Porque la oficialidá ye’l reconocimientu llegal de les llingües d’Asturies necesariu pa la so normalización, dignificación, recuperación, promoción y usu n’igualdá de condiciones col castellanu.

Y préstanos que seya en Bimenes porque va cuasi venti años yá, nesti Conceyu entamóse un camín polos derechos y la dignidá de la xente d’Asturies que nun va tener nunca vuelta atrás. Bimenes entamó’l camín y Bimenes quier siguir siendo’l símbolu d’esti llabor y d’esta llucha por un futuru pal asturianu y p’Asturies.

Y préstanos facelo güei porque güei aconceyamos equí con xente de toa Asturies y de munches otres partes de fuera que tienen nel amor al nuestru idioma común un referente vital ineludible. Güei d’esti conceyu tien que salir un impulsu nuevu p’asegurar el futuru de la llingua.

Los y les firmantes de Conceyos pola Oficialidá comprometémonos públicamente a trabayar nos trés años de llexislatura que queden en buscar los llímites de la llexislación vixente, demostrando que ye ruina y insuficiente pa garantizar los derechos de los falantes, si fai falta visibilizando’l conflictu y la ineficacia pa cumplir coles disposiciones internacionales, como acaba de facer el plenu de Bimenes.

Comprometémonos a proponer ordenances d’usu del asturianu y planes de normalización nos nuestros respectivos conceyos, compatibles cola declaración de la oficialidá y que pongan yá les condiciones pa la so aplicación na vida municipal.

Comprometémonos, p’acabar, a reclamar a la Xunta Xeneral, que ye onde se tien qu’aprobar, la declaración de la oficialidá, y vamos facelo de manera coordinada y firme, porque yá ye tiempu de que los nuestros representantes tean al altor de les circunstancies y pongan fin a tantos años d’inxusticia.

Munches gracies.

¡Puxa Asturies!

¡Oficialidá!

Bimenes, 2 de xunetu del 2016, XX Fiesta de la Oficialidá.

Fonte: Asturies.com