L'asturianismu recuerda a Pin el de Cigüedres nel quince aniversariu de la so muerte

Xosé Álvarez Fernández, Pin el de Cigüedres

• . L’ALLA anuncia la espublización del ‘Vocabulariu de Miranda’
• 
  
•  Xosé Álvarez Fernández foi l'impulsor del Conceyu d'Asturies en Madrid y destacó pol so llabor nel procesu de normalización llingüística y pola so defensa del país.

  Pin, como yera conocíu, nació en Cigüedres, nel conceyu de Miranda, nel 1948. De bien nuevu emigró, primero p’América y depués pa Madrid, cola so familia. Interesáu dende siempre pola cultura asturiana pese a vivir siempre fuera del país, ganó nel añu 1973 el primer concursu de rellatos n'asturianu qu'entamaba'l Muséu del Pueblu d'Asturies col testu 'El bable de Xuanín', convirtiéndose naquel tiempu nún de los autores más importantes del Surdimientu, emplegando primero l'asturianu occidental, anque depués tamién utilizara con soltura'l central.

  Nel añu 1976 impulsa l’asociación cultural Conceyu d’Asturies en Madrid xunto con otros asturianos residentes na capital castellana, una organización clave pa entender la evolución del asturianismu y el procesu de recuperación llingüística. Nestos años entamó conferencies nel Centru Asturianu de Madrid, asina como cursos de llingua asturiana o alcuentros d'asturianos na Casa de Campo.

  Tamién dedicó nesti tiempu, nunos años nos qu'entovía nun taba normativizáu l'idioma, munchu esfuerciu xunto a dalgunos de los sos compañeros del Conceyu d'Asturies na ellaboración d'unes normes y un diccionariu, el 'Vocabulariu de Miranda', qu'espublizó l'Academia de la Llingua Asturiana nel añu 2012. El llibru asoléyase dientro de la coleición de l’ALLA de nome ‘Preseos’, conformando asina’l volume 13 de la mesma.

  'El bable de Xuanín (ia outros cuentos)' foi la primer obra qu'espublizó, nel añu 1980, a lo que siguieron 'Fíos de naide' (1981), 'Cuentos de nós' (1983) y 'Lus tres reis' (1983), amás de dellos artículos y dos trabayos inéditos. Nel añu 2000, Ediciones Trabe recopiló los sos trabayos en 'Cuentos' tres l'enfotu de munchos años d'espublizalos d'Antón García. Pin finalmente accedió a ello cola condición única de que García firmara'l prólogu.

  Nel tarrén políticu, el de Cigüedres yera un nacionalista d'izquierdes convencíu, comprometiéndose nos proyeutos políticos que nacieren mientres la década de los 80. Tres unos años menos implicaos, nel 1999 quixo retomar el so llabor militante activu, pa lo que contautó con vieyos compañeros. Llamentablemente, el 11 de xunetu del 2001, ayeri hai quince años, finaba d'un infartu na so aldea natal.                                   Fonte: asturies.com