4/7/16

L’asturianu torna a ser oficial en Bimenes

Plenu municipal pola Oficialidá en Bimenes (semeya de la XDLA)

 Bimenes abrió’l camín nel 1997 y esti sábadu, 19 años depués, torna a facelo. L’asturianu ye oficial nel conceyu yerbatu tres l’aprobación d’una declaración d’oficialidá por unanimidá pol Plenu municipal.
 L’alcalde de Bimenes, Aitor García Corte, recordó nun salón de plenos que se quedó pequeñu aquella primer declaración d’oficialidá, torgada pol recursu presentáu nel 1998 énte'l Tribunal Superior de Xusticia d'Asturies (TSXA), con sentencia ratificada pol Tribunal Supremu al considerar los tribunales que los ayuntamientos nun tienen competencia pa ello, y destacó que “casi venti años depués nun vivimos la mesma realidá social y política, y tenemos l’asturianu presente y normal, polo que aprovechamos la venti folixa queremos declarar la oficialidá”.
 La Declaración de los Derechos Humanos, la Constitución, la Llei d’Usu y Promoción del Bable/Asturianu y otros alcuerdos internaciones foron señalaos pol primer edil p’argumentar la decisión de Bimenes de reconocer los derechos llingüísticos de los yerbatos. “Entendemos que nun facemos nada lloñe de la llei”, apuntó, pa depués declarar “la oficialidá dientro de les llendes del conceyu de Bimenes” y facer la votación, que tuvo l’apoyu de tolos conceyales de les cuatro formaciones con representación: PAS, IX, Xente Yerbato y PSOE. Darréu, los aplausos enllenaron la sala. Por último, recordó que “la oficialidá nun conlleva obligatoriedá”.
 Tres l’actu políticu, nel qu’hebo conceyales d’otros puntos del país de diferentes signos políticos, asina como diputaos de la Xunta Xeneral y l’alcalde de Miranda de l Douro, Artur Nunes, García Corte lleó un manifiestu a la xente que quedó fuera por temes d’espaciu y comenzó la XX Fiesta de la Oficialidá, con actividaes a lo llargo de tol día.Fonte: asturies.com

No hay comentarios:

Publicar un comentario

Los comentarios tán pendientes de moderación. Espublizaránse lo primero dable.