10/4/16

"El complexu d'inferioridá vien de cuando los mayestros del franquismu emplegaben la violencia por usar l'asturianu", afirma Galán



"El complexu d'inferioridá vien de cuando los maestros del franquismu emplegaben la violencia por usar l'asturianu", afirma Galán
Ésta yera "verbal, y inclusive física en dalgunos casos", apunta l'escritor y periodista, que punxo la conferencia 'Una güeyada a los discursos llingüísticos na Asturies del franquismu' nun congresu sobre la llingua española que se celebra en Xixón. Inaciu Galán ta preparando la so tesis, que dedica a la situación del idioma mientres la dictadura.
La Universidá Llaboral acueye dende'l miércoles el XVI Congreso Internacional de la Asociación de Jóvenes Investigadores de Historiografía e Historia de la Lengua Española, que fina güei y que dedicó ayeri una serie de comunicaciones a la sociollingüística, con charres sobre la situación del xudeoespañol en Turquía, el bereber nel norte de Marruecos y el llinguaxe inclusivu. Nesa estaya, la organización convidó a Galán –qu'emplegó l'asturianu na so intervención– pa falar sobre la temática de la so tesis, na que lleva un añu y mediu trabayando y qu'espera tener finada pal 2018: la situación de la llingua asturiana nel franquismu.
Na charra l'escritor fixo un adelantu de lo que va ser la tesis al públicu presente, mayoritariamente de fuera d'Asturies, empezando por repasar los años previos a la Guerra Civil, época na que "hebo bastantes iniciatives interesantes" y que cuenta como fechu más destacáu la creación, nel 1919, de la Real Academia Asturiana de les Artes y les Lletres, institución que "tenía mui claro" la normativización del idioma y la ellaboración d'un diccionariu y una gramática, anque la falta d'apoyos impidió qu'estos oxetivos salieren alantre.
L'asturianu tamién tuvo pesu nesti tiempu nel teatru asturianu, no que sería los anicios del teatru costumista, y na zarzuela. D'igual forma, contó con autores lliterarios del pesu de Fernán Coronas, "que reivindicó cola so obra una llingua pal futuru". Sicasí, esti periodu viose frenáu pola guerra, que llevó a la muerte o al esiliu a munchos de los sos protagonistes.
Primeros tiempos del franquismu
La creación nel 1945 del Instituto de Estudios Asturianos, actual RIDEA, permitió reconstruyir lo perdío por mor del periodu bélicu, institución dende la que trabayaron persones como Constantino Cabal o Antonio García Oliveros. Nestos primeros años entamáronse dende'l RIDEA actividaes como'l Día de la Poesía Bable, nel 1948, amás de dellos concursos de poesía.
García Oliveros tamién espubliza nel 1947 el 'Diccionariu bable de la rima', llibru empobináu a "facilitar vocabulariu pa da-y usu na ellaboración de poesía", pero nos años siguientes "s'empieza a pensar d'otra manera. A tener una visión dialectizante del idioma". Son tiempos nos qu'esiste una prohibición xeneral por parte del franquismu de les llingües llariegues, que n'Asturies ye menos intensa pola falta de "un movimientu encadarmáu" como l'esistente n'otros territorios con idioma propiu.
Onde sí hai un represión verdadera ye na escuela. "Nesti tiempu tol mundu vivió situaciones onde los mayestros del franquismu emplegaben violencia verbal, y inclusive física en dalgunos casos, por usar l'asturianu. D'ehí vien el complexu d'inferioridá que tienen les persones que vivieron los años del franquismu", señala Galán. Esti puntu va centrar bona parte de la tesis del escritor, que va facer entrevistes nos próximos meses pa conocer casos acontecíos nesa dómina qu'ayuden a contestualizar la época.
Asociación de Amigos del Bable
Enantes de los comienzos de Conceyu Bable, allá pol 1974, Galán considera mui destacada la creación de l'Asociación de Amigos del Bable nel 1969, dos años depués de la muerte de Cabal. "Yeren franquistes convencíos, pero supón un pasu alantre importante nesti tiempu", afirma l'investigador, que señala la so reivindicación de la poesía bable, la ellaboración de discos nos que periodistes destacaos de la época, como Menchu Álvarez del Valle, recitaben n'asturianu, o l'entamu del Día d'Andecha del Bable, una especie de gala col idioma como protagonista.
Un periodu, poro, mui interesante nel que Galán va afondar na so tesis, que previsiblemente va terminar nun periodu cercanu al añu y mediu, según les previsiones del autor.
Fonte: Asturies.com

1 comentario:

  1. La repressió va existir a tota Espanya però no va suposar un complex d'inferioritat a tot arreu. Crec que hauria d'anar més enllà del franquisme.

    ResponderEliminar

Los comentarios tán pendientes de moderación. Espublizaránse lo primero dable.