21/4/16

El PP d'Aragón anuncia una quexa pol emplegu del catalán nes Cortz

Cortz d'Aragón, La Alfajería: semeya obra de 'ecelan' baxo llicencia CC BY 2.5.

  Al igual qu'asocede n'Asturies, el Partido Popular (PP) nun quier que nes Cortz d'Aragón s'emplegue una llingua distinta al castellanu. El diputáu Fernando Galve, que tamién cargó contra l'aragonés, anunció esti martes una quexa énte la Mesa de les Cortz tres l'usu del catalán nuna comisión por parte d'Alfonso Clavería (Podemos).
  En concreto foi na 'Comisión de Comparecencias de les Cortes', qu'acoyía la intervención de trés representantes de la plataforma 'No hablamos catalán'. Clavería constestó a estes persones con una frase na qu'amiestaba'l catalán estándar y la variedá llocal de Fraga, cola intención d'amosar l'asemeyanza ente dambes, lo que provocó la indignación de Galve, pese a que tamién el representante de la Chunta Aragonesista saludara en catalán a los presentes o que'l de Ciudadanos, Joaquím Samsó, orixinariu del oriente d'Aragón, emplegase de manera espontánea dalguna pallabra nesa llingua.
  El popular, que sofitó los plantegamientos de la plataforma, afirmó que "n'Aragón nun falamos catalán" y protestó a la presidenta de la comisión, Itxaso Cabrera, tamién de Podemos, "por permitir falar en llingües que nun son l'español". Darréu calificó a Clavería de "maleducáu" y catalogó de "desagradable" tener que "sentir falar aragonés y catalán o nun se qué idioma" nel Parllamentu. D'igual forma, anunció una quexa énte la Mesa de les Cortz por nun tar contempláu l'usu de les llingües propies del país nel reglamentu de la Cámara.
  Esta situación recuerda a la postura amosada pol PP asturianu na Xunta Xeneral, impidiendo que s'utilizara l'idioma na Comisión d’Estudiu sobre Réxime, Proteición y Promoción del Asturianu, anque la Llei d'Usu y Promoción del Bable/Asturianu da llibertá a los diputaos pa emplegar l'asturianu y gallego-asturiano, que se sienten davezu nel Parllamentu. Sicasí, el reglamentu de la Cámara nun permite l'usu d'una llingua diferente al castellanu nes comunicaciones internes de la Xunta Xeneral.                  Fonte: asturies.com

7 comentarios:

  1. Paez que Podemos, fiel al so sistema y programa, intentó otra vegada romper, diseccionar, entorpecer, trabar, o desfaer el bon funcionamientu de les Cortes Aragoneses esta vegada emplegando'l catalán como argumentu ficticiu.

    ResponderEliminar
  2. Clemen conoces perbién a Podemos o eso mesmu paez.

    ResponderEliminar
  3. Pos sí que ye pa tenelos mieu Selene, muncha rabia mal contenida, enforma odiu, enforma... amenaza latente nes sos declaraciones, nes sos palabres d'acaldía.

    ResponderEliminar
  4. La discriminación del PP escontra les llingües non castellanes del Estáu va pagala cara.

    ResponderEliminar
  5. >>> "por permitir falar en llingües que nun son l'español"

    O sigui, el català no és una llengua espanyola. Gràcies, PP, per expulsar-me una mica més.

    El que no m'esperava era veure que els expulsionistes tenen tants seguidors a Asturies. Clemen, Selene...

    ResponderEliminar
  6. Nun ye eso, David, has d'entender que nun ye pola llingua catalana en sí sinón pol sistema esto ye pola forma d'invadir, ¿entender o non? a tol mundu gústa-y y defende lo suyo y la so independencia no suyo. Creo que ye daqué bien dignu y bono d'entender.

    ResponderEliminar
  7. Envair què, ignorant? I l'aragonès, també el porten els invasors?

    Massa tele veus tu, Babayón.

    ResponderEliminar

Los comentarios tán pendientes de moderación. Espublizaránse lo primero dable.