'Quixote ilustráu' muestra tamién el procesu creativu de les imáxenes por parte de Juan Hernaz pal clásicu de la lliteratura tornáu al asturianu por Pablo Suárez García.
Los visitantes que s'averen hasta'l 15 de mayu al anterpar de la segunda planta del xixonés Centru de Cultura Antiguu Institutu van atopar una ventena de paneles esplicativos, profundizando nes carauterístiques conceptuales y téuniques de cada imaxe, asina como orixinales y reproducciones de los bocetos, cuadernos y estractos de testu anotaos pol autor, xenerando una muestra que trata d'indagar na obra, desnudándola al situar l'acentu na dinámica de trabayu más que nel resultáu final. En definitiva, un percorríu pel procesu en toles sos fases, dende la documentación y les primeres llectures anotaes hasta los orixinales en grafitu, pasando per tolos bocetos preparatorios.
Pa Hernaz esto último ye "la parte más interesante del trabayu, lo íntimu y ocultu que raramente tresciende: onde añeren tolos tropiezos y los pequeños aciertos que conformen el trabayu final y onde hallamos los artificios qu'imprenten caráuter a cada imaxe, too aquello que nos permite deprendar, avanzar, superar...". El xixonés encargóse de facer les ilustraciones pa la torna imprescindible de les aventures del Quixote fecha por Suárez García, editada por Laria, con un resultáu final espectacular, al nivel de la propia obra.
El vienres presentóse la esposición, actu que contó cola presencia d'Hernaz y de los direutores xenerales de Planificación Llingüística y Normalización y d'Universidaes y Investigación, Fernando Padilla y Cristina Valdés, de manera respeutiva, amás de la conceyala de Cultura, Educación y Cooperación, Ana Montserrat López Moro; de la responsable de la Oficina de Normalización Llingüística, María Xosé Rodríguez López; y d'Eduardo García en representación d'Ediciones Laria. Fonte: asturies.com
Bien interesante, hai que visitala.
ResponderEliminar