El “Madreñazu” foi pal discursu ranciu y discriminatoriu presente tovía en dalgunes instituciones y qu’amplifiquen dellos medios de comunicación, exemplificáu nel casu de Miguel Alarcos.
La Xunta pola Defensa la Llingua Asturiana (XDLA) anunciaba esti vienres 11 d’avientu pela mañana los ganadores de los Premios Andrés Solar na XXXI edición. Nesta ocasión, el Pegollu foi pa Sidra L’Allume. El “Madreñazu” foi “pal discursu ranciu y discriminatoriu presente tovía en dalgunes instituciones y medios de comunicación, exemplificáu nel casu de Miguel Alarcos”.
Nos sos más de trenta años de trayeutoria, los premios tienen una vertiente doble: “per un llau, la Xunta premia a una entidá o persona que rescamplara pol so llabor en defensa o promoción del asturianu: esti reconocimientu materialízase nel Pegollu. Pero los Premios Andrés Solar tienen tamién una versión negativa, que destaca a la persona o entidá que rescamplara pol so llabor negativu pa cola llingua asturiana”. Esti honor tan duldosu represéntase con un “Madreñazu”.
El Pegollu d’esti añu 2015 quier reconocer el llabor de Sidra L’Allume, que vien llevando alantre un proyeutu cooperativu d’ellaboración y comercialización de sidra usando y visibilizando l’asturianu tanto nel productu como na so difusión comercial y publicitaria. Por eso son bonos merecedores d’esti premiu.
El “Madreñazu” nesta edición va pal discursu ranciu, asturianófobu y discriminatoriu que sigue presente en dalgunes instituciones y que, sistemáticamente amplificáu por determinaos medios de comunicación, tuvo esti añu la so espresión más clara nel casu recién de Miguel Alarcos. Por too esto, la Xunta pola Defensa de la Llingua Asturiana considéralu bon merecedor del antipremiu.
La entrega de los Premios va facese’l sábadu 19 d’avientu a les 19:30 hores nel Antiguu Institutu de Xixón.
Tamién, como tolos años, depués del actu va haber una espicha. Esti añu va ser nel chigre xixonés Cheff Fidel (cai Padilla, 12), y la entrada val 20 euros. Pa dir, hai qu’acutar sitiu, y pa eso pue llamase al 985229553 o mandar un corréu al correu principal de exunta.org
Fonte: Asturnews
No hay comentarios:
Publicar un comentario
Los comentarios tán pendientes de moderación. Espublizaránse lo primero dable.