Ramón d’Andrés fala nel Atenéu de verdaes y mentires alredor de les llingües

Na semeya, Gonzali y d'Andrés

  Estii martes 15 d’avientu a les 20 hores nel local social del Atenéu Obreru de Xixón, Ástura entama una conferencia sobre “Verdaes y mentires alredor de les llingües”, al cargu de Ramón d’Andrés.

  Como se deplica na convocatoria del actu, “el llinguaxe humanu y la diversidá de llingües nel mundu ye oxetu d’estudiu de la llingüística, una disciplina que trabaya pel métodu científicu. En más d’un sieglu d’esistencia, la llingüística científica fixo bien de descubrimientos sobre la naturaleza del llinguaxe humanu y -yos llingües, que dexaron a un llau falses creyencies nesti campu. Ensin embargu, munches d’estes escurras falses siguen mui vives y condicionen l’alderique intelectual na nuesa sociedá. Nesta conferencia va facese un pequeñu catálogu d’estes creyencies pseudocientífiques, diseccionándoles y desmintiéndoles a la lluz de la llingüística científica”.

  Ramón d’Andrés ye Profesor titular de Filoloxía Española y Asturiana na Universidá d’Uviéu. La so trayectoria investigadora venceyase a diverses temátiques rellacionaes col asturianu, dende la descripción gramatical o’l léxicu, a la normativa, situación sociollingüística, toponimia y dialectoloxía. Foi corredactor de les Normes Ortográfiques y del Diccionariu de la Llingua Asturiana, y ponente de la Gramática de la Llingua Asturiana, obres de l’Academia de la Llingua Asturiana. Miembru de númberu de la mesma Academia y correspondiente del Real Institutu d’Estudios Asturianos, coordina’l grupu d’investigación «Seminariu de Filoloxía Asturiana», de la Universidá d’Uviéu. Director de los proyectos «Estudiu de la Transición Llingüística na Zona Eo-Navia, Asturies (ETLEN)» y el «Observatoriu Asturianu de Neoloxía y Terminoloxía (AsturNeo)». Miembru del comité de redacción de la Revista de Filoloxía Asturiana y de la Xunta Asesora de Toponimia del Principáu d’Asturies. Ente los sos llibros figuren: Diccionariu temáticu de la llingua asturiana (1991), Encuesta sociollingüística nuna parroquia asturiana (Deva-Xixón) (1993), Gramática práctica d’asturianu (1997), Cuestiones d’asturianu normativu (2001-2003), Xuicios sobre la llingua asturiana. Delles cuestiones básiques avera del alderique llingüísticu n’Asturies (2002), Diccionariu toponímicu del conceyu de Xixón (2008), Llingua, ciencia y fronteres (coordinador, 2011) o Gramática comparada de les llingües ibériques (2013). Desenvuelve tamién un intensu llabor de divulgación en llibros, ensayos y artículos de prensa.                                                                                              Fonte: asturnews.com