Iniciativa pol Asturianu súmase un añu más a la Manifestación pola Oficialidá

El Día de les Lletres Asturianes ye la fecha na que tradicionalmente se sumen fuercies pa reclamar la oficialidá del asturianu nes cais d'Asturies. Dende Iniciativa pol Asturianu, pretendemos tener presencia na cai esi día tan señaláu; ye por ello qu'asitiaremos un puestu informativu na plaza de La Escandalera d'Uviéu pa dar a conocer l'asociación, aprovechando pa facer dalguna aición complementaria (repartu de folletos, venta de material,...).

Amás, como cada añu, sumámonos a la convocatoria de Manifestación pola Oficialidá que va salir el vienres 3 de mayu a les 19:30 hores de la Estación del Norte d'Uviéu. Prestaríanos enforma que t'animares a collaborar nestes actividaes; nun duldes en treslladanos la to disponibilidá al traviés de cualquiera de les canales de comunicación d'Iniciativa pol Asturianu.

Iniciativa pol Asturianu quier facer un llamáu a la sociedá pa participar nesta reivindicación, organizada pola Xunta pola Defensa de la Llingua Asturiana y perimportante pal futuru d’Asturies y de la so cultura. Nesti últimu añu la situación del idioma tuvo importantes problemes. En dalgunos casos esos problemes superáronse gracies al trabayu reivindicativu, lo que demuestra la importancia de participar nesti llabor.

Iniciativa pol Asturianu ye una organización que ñació pa implicar a tola sociedá asturiana nel procesu de recuperación y normalización del asturianu, y polo tanto camienta imprescindible que la sociedá s’implique y faiga oyer la so voz, que ye mayoritariamente favoratible a que l’asturianu se convierta nuna llingua normal, que pueda usase en tolos ámbitos y que tenga garantizáu’l so futuru, lo que solo ye posible si esta llingua ye oficial.

Anque ye verdá que la oficialidá nun ye una varina máxica que vaiga solucionar tolos problemes del idioma d’una vegada, pero sí ye imprescindible pa que’l procesu de recuperación del asturianu pueda llevase alantre. Problemes como los surdíos esti añu nel campu educativu, nun sedríen talos si la llingua tuviera l'estatus d'oficialidá que merez.

Iniciativa pol Asturianu aprovecha pa recordar que dempués de la manifestación va celebrase nel Teatru Campoamor la Xunta Estraordinaria de l’Academia de la Llingua Asturiana y que la entrada ye llibre y de baldre. Animamos a la xente a participar d'esti actu de sogitu a la institución.

Fonte: Iniciativa pol Asturianu