CRIXIXONA 2013

¿Qué ye la CRIXIXONA 2013? 

La CRIXIXONA ye la cita española de la masa crítica mundial que va facese en Xixón  del 17 al 19 de mayu del 2013. La masa crítica celebraráse’l sábadu 18 dende les 17 hores.

¿Pero qué ye una masa crítica?

Una masa crítica nun ye más qu’un grupu de ciclistes que pedaleen xuntos durante un ratu, siguiendo una ruta marcada de mano o non, reivindicando l’espaciu públicu pa la bicicleta.

Si tabes atalando en reacciones en cadena, nun dibes mal desencamináu: una bayura de ciclistes van xuniéndose unos a otros espontáneamente hasta algamar un númberu col que tomen el control de les cais de la ciudá, cambiando les relaciones de poder na calzada: unos pocos ciclistes puen ser arrequexaos nel tráficu diariu pero 50, 100 o 1000 ciclistes aduéñense del paisax urbanu y reclamen el so espaciu na cai, esi espaciu que l’omnipotente coche nos robare, al tiempo que se visibilicen los sos ideales y forma de vida. Esto ye y asina se forma la masa crítica.

Aniciu del movimientu

El so nome ta tomáu de la película documental de Ted White al rodiu del ciclismu, “Return of the Scorcher” (1992). Nél, George Bilss cunta como en China los ciclistes que nun puen cruzar una interseición por mor del tráficu d’automóviles y a la inesistencia de semáforos, van amontonándose esperando pa cruzar, y cuando s’algama un númberu suficiente pa parar el tráficu entós crucen la cai. Esti fenómenu denomínase por primer vez “una masa crítica”.

L’aniciu del movimiento dizse que tuvo’l so orixe en San Francisco en setiembre de 1992 como un aconceyamientu de coleutivos  diferentes nuna reivindicación festiva del espaciu públicu urbanu. El movimientu espardióse con velocidá per tol mundu y una vegada al añu celébrase al empar en cada país una sola masa crítica y que n’España llámense “criticonas”. Les últimes criticones tuvieron llugar en Madrid (2010), Bilbao (2011) y Valladolid (2012). Y en mayu del 2013 celebraráse en Xixón.

N’Asturies, el movimientu “masser” ta enllenu de vitalidá y celébrense tolos meses 3 mases crítiques en Xixón, Uviéu y Avilés. En Xixón celébrase’l caberu vienres de cada mes y quedamos a les 20:30h na Plaza del Institutu (o del Parchís).

¿Cómo funciona una masa crítica?

L’orixe del movimientu ta nuna idega cenciella pasada de boca en boca ente ciclistes qu’arrancó espontáneamente y que se fizo costume pol placer d’aconceyase y compartir unes pedalaes pela ciudá. Como siempres quedaben nel mesmu sitiu y a la mesma hora, nun facía falta nenguna publicidá. Como yera una reunión espontánea nun yera necesariu pidir nengún tipu de “permisu”.

Y nel so orixe ta la so base y el so principiu reutor: la masa crítica nun la organiza naide, naide tien el control sobre ella y naide respuende por ella. Como naide la organiza, naide pue pidir “permisu” dalgún y naide la tien qu’autorizar: nun fai falta autorización de nengún tipu yá que nun ye una manifestación nin nada asemeyáu. Solamente ye un aconceyamientu d’usuarios de la bicicleta a los que-yos apetez dar un paséu pela ciudá y casualmente salen toos xuntos, al mesmu tiempu y siguiendo’l mesmu recorríu.

El fechu de que la masa crítica seya mui numberosa nun la convierte nuna manifestación. Esto ocurre a diariu en nuestres ciudaes colos coches: agloméranse en cantidaes increíbles a las denominaes “hores punta” colapsando les víes urbanes ya interurbanes y les fuercies del orde nun-yos exixen nengún tipu d’autorización especial nin los considera una manifestación. Nin siquiera cuando van/vuelven de dalgún espectáculu de mases como un partíu de fútbol, se-yos considera una amenaza al orde públicu, sinón que faciliten el desendolcu del so comportamientu irracional poniendo al so serviciu decenes d’axentes pa regular “el tráficu”.

Que tean toos fartucos de l’agresión diaria de los coches y del ruíu y la polución que xeneren nun ye casualidá, claro, como tampoco lo ye que seyan un grupu de xente que cree que otro modelu de sociedá ye posible y que lu reivindiquen na masa crítica.

Nun se pue escaecer que la masa crítica ye una celebración del ciclismu y una reivindicación de la bicicleta como mediu de tresporte alternativu, cómodu, económicu, nun contaminante y silenciosu. Y como celebración, ye divertida, dinámica y colorista: anímase con disfraces, música y lemes que los ciclistes coreen allegremente.

Coses importantes a considerar:

• La fecha y la hora deben ser fixes pa que tol mundu les sepa y puea dir.
• Si se xuntan munchos ciclistes esto atraerá l’atención de la policía municipal: si piden autorización namái hai que-yos comentar que nun ye una manifestación. Ún pue montar en bicicleta cuando quiera, yel so drechu.
• De lo anterior sácase la importancia de respetar les normes de circulación. Cumplamos les normes: si queremos que se nos respeten, respetémosles.
• Nun fai falta siguir un itinerariu fixu. El recorríu pue cambiar d’una vez pa otra y los que vayan na tiesta puen dir marcando’l camín de la masa crítica.
• Tienen  d’evitase les cais estrenches que puean producir cortes na masa crítica. Les cais y aveníes anches favorecen la visibilidá del fenómenu, fundamental pa dar a conocer el so conteníu ciclo-reivindicativu.
• Los que van na tiesta deben cuidar que nun se separen los ciclistes y procurar que los semáforos nun corten la masa.
• El respetu impecable al peatón ye una obligación: pa nos, los ciclistes, el peatón ye un aliáu natural, non un enemigu. El lobby automovilista davezu yá s’encarga d’engrifanos a los unos escontra los otros. Que la masa crítica sirva pa desmontar esa falsa polémica.
• Nes víes con carril bus debemos respetalu y dexalu llibre. Los profesionales del volante tán trabayando y merecen el mayor respetu. Amás, mirándolo pol llau práuticu, dexamos una vía llibre pa los coches “nerviosos” y asina evitamos cualquier tipu d’enfrentamientu.
• Los enfrentamientos colos automovilistes nun conducen a nada a nun ser crispación y la masa crítica ye pa divertise.

Fonte: www.asturiesconbici.org