Radio Sele, a la gueta de nuevos socios pa sobrevivir

La emisora llibre uvieína necesita nuevos socios que garanticen el cubrimientu de los sos gastos pa tornar a emitir na FM y siguir cola actividá.

Dende la emisora comunitaria Radio Sele, la única radio qu'emite dafechu en llingua asturiana dende la so creación nel añu 1986, tán acabantes de facer un llamamientu de collaboración pa la continuidá de la so actividá. Como ye conocío dende va meses, la emisora uvieína necesita un total de 6.000 euros esti añu pa siguir emitiendo. Al traviés de donaciones, un conciertu de sofitu, o la venta de materiales propagandísticos, yá s'algamaron más de 3.000 euros, suficiente pa cubrir la primer metá del añu, pero entá lloñe de cumplir l'oxetivu anual.

Nesi sentíu, los miembros de Radio Sele alerten de que necesiten el sofitu popular mediante nuevos socios, que garanticen suficiente base económica como pa poder continuar cola actividá, y tornar a emitir al traviés de la Frecuencia Modulada. De lo contrario, Radio Sele va a vese obligada a echar el pieslle a finales de Xunu Poro, encamienten a rellenar los datos de la fueya de sofitu de la imaxe -especificando con qué cantidá económica se desea collaborar- y unviala a radiosele@yahoo.es . Otra manera de collaborar ye facer una donación puntual a la cuenta na Caja Rural de l'Asociación Cultural Secha: 3059 0001 18 2366328629.

Compromisu por Uviéu afala a sofitar a Radio Sele

Dende Compromisu por Uviéu treslladaron el so sofitu a la emisora uvieína, ya informaron de que "tamos promoviendo una campaña ente los nuestros militantes y simpatizantes pa conseguir socios cotizantes y afalamos, tamién, a la ciudadanía a sofitar económicamente mediante cuota regular y llibre a Radio Sele." Tal como ye bien conocío, afiten que"l’oxetivu de la radio nes prósimes selmanes ye asegurar cotizantes que cubran los seis mil euros añales de gastos fixos en renta y gastos corrientes".

Fonte: Infoasturies