El C. P. Monteana adopta la toponimia oficial: "Colexu Públicu Montiana"

El Colexu Públicu de Montiana adopta la toponimia oficial

Colexu Públicu Montiana, parroquia de Fresno, Xixón

De Monteana a Montiana.
   La escuela del barriu de la parroquia xixonesa de Fresno, que cuenta con 90 alumnos, ta acabante de camudar el nome p’adaptalu a la toponimia oficial. D’esta forma, sigue los pasos d’otros centros, como’l de Xove.

   “El topónimu ye Montiana; ye dalgo llóxico”, esplica Montserrat López Moro, direutora del centru, que principió a mover el cambiu de nome hai más d’un añu. Tres consiguir l’aprobación del claustru, treslladó l’asuntu al Conseyu Escolar –formáu por trés padres, trés profesores, representantes de la Casa Conceyu, una secretaria ensin voz nin votu y la propia direutora–, que dio lluz verde a la modificiación por unanimidá. Finalmente, y gracies a l’asesoramientu de la Direición Xeneral de Política Llingüística, esti mes procedióse a la oficialización del nome n’asturianu pal centru escolar públicu del barriu tres la espublización nel BOPA de la resolución de la Conseyería d’Educación, Cultura y Deporte.

   Con muncha tradición nel enseñu de la llingua asturiana, llegando a tener un 100 por cien d’alumnos matriculaos na materia, el colexu de Montiana cuenta con más del 90 por cientu de los escolinos y escolines dando clase d’asturianu. “Ye necesaria una estabilidá mayor pa los críos; nun se pue camudar de profesor cada añu”, esplica López Moro, que demanda “oposiciones pa profesores de Llingua Asturiana pa Primaria, como se fai col inglés”, dalgo que, apunta, depende namái de la voluntá de los responsables políticos. La direutora, que ta trabayando agora na ellaboración d’una circular pa los padres, tamién llamenta “la poca repercusión mediática” que tuvo’l cambiu de nome del centru.

Felicitaciones d’Iniciativa pol Asturianu
   Ún de los pocos mensaxes que recibió la direición del Colexu Públicu de Montiana vieno d’Iniciativa pol Asturianu, qu’unvió al centru una felicitación. Nella, aprovechó pa convidar a los sos responsables “a siguir dando pasos na visibilidá del asturianu nel centru, talos como siguir faciendo medrar la matriculación na asignatura, usar l'asturianu na páxina web y na rotulación del centru, etc.”. Según considera’l coleutivu cívicu, la decisión d’adoptar la toponimia oficial por parte de la escuela de Montiana “demuestra una vegada más que l'Alministración va mui per detrás de la ciudadanía nel usu de la toponimia tradicional y oficial d'Asturies”, como asocedió col casu de Xove, tamién en Xixón.

   “Iniciativa pol Asturiana aprovecha p'animar a otros centros educativos a dar pasos nesti camín hacia un usu normal del asturianu, que dea a los alumnos y a tola comunidá educativa una visión del asturianu como una llingua que nun s'usa namás nes actividaes de l'asignatura de Llingua Asturiana, sinón en tola ámbitos de l'actividá escolar; como una llingua d'usu normal”, esplica’l coleutivu nun comunicáu.

   Fonte:  Asturies.com