Denuncien que PP y PAR quieren aprobar una Llei de Llingües que dexará de reconocer l'Aragonés y el Catalán

PP y PAR aprobarán una Llei de Llingües que dexará de reconocer l'Aragonés y el Catalán

   El prósimu 9 de Mayu PP y PAR aprobarán presumiblemente una nueva Llei de Llingües, onde Catalán y Aragonés dexarán de reconocese como tal.

   Según denuncien dende la organización independentista aragonesa Puyalón de Cuchas, el pasáu 26 d'Abril los partíos que caltienen el gobiernu nel país, PP y PAR, presentaron una nueva Llei de Llingües que previsiblemente va a aprobase'l 9 de Mayu, dao que cunten cola mayoría absoluta nes cortes aragoneses. La nueva Llei de Llingües pasará a denomar al Catalán como "Llingua Aragonesa Propia del Área Oriental (LAPAO)", y al Aragonés como "Llingua Aragonesa Propia del Área Pirenaico y Prepirenaico (LAPAPYP).

   A xuiciu de Puyalón de Cuchas esta aición "dexa'l gobiernu aragonés nel lláu del ridículu más absolutu de la comunidá científica mundial". Amás, consideren qu'esti nuevu marcu llegal dexa ensin drechos a miles de falantes d'estes llingües propies del país, demientres que la intención del gobiernu ye potenciar un billingüismu basáu nel castellán y una llingua foriata, p'asina zarrar l'alderique de la enseñanza de llingües minorizaes nel estáu español. Poro, consideren un atropellu a los drechos llingüísticos l'aición del gobiernu aragonés, y una falta de respetu haza les denomaciones internacionales y académiques.

   Fonte:  InfoAsturies.