El Teatru de la Llaboral va repetir como sede pal VII Premiu al Meyor Cantar

   El Teatru de la Llaboral va repetir como sede de la gala del Premiu al Meyor Cantar del añu 2012

   Yá se conocen les cinco formaciones que van lluchar el 1 de marzu pol VII Premiu al Meyor Cantar nel Teatru de la Llaboral, que repite como sede de la gala. Éstes son ACD, Aire, Fala Non Caduca, La Tarrancha y Taranus.

   Once yeren les bandes qu’aspiraben a entrar na final d’esti gallardón –La Tarrancha, pese a que nes primeres informaciones nun taba presente, tamién concursó– que cuenta cola participación nel Liet International 2013, que va celebrase esta seronda en Còrsica, como recompensa. Esta edición del Premiu al Meyor Cantar tien la particularidá de que los cinco finalistes avéranse más al rock qu’a la música tradicional, cola esceición d’Aire, grupu formáu Mapi Quintana, Jacobo de Miguel, Xuan Nel Expósito, Elías García y Fernando Arias que nació l’añu pasáu col oxetivu de dedicar un trabayu al acordión diatónicu o de botones, con gran presencia nos nuesos sones, pero poques vegaes protagonista discográficu. Esti conxuntu d’escelentes músicos va participar col cantar ‘Enzo’ (lletra de Ruma Barbero), un homenaxe al xenial Enzo Ferrero, consideráu’l meyor estranxeru que pasara poles files del Sporting nos sos casi 108 años de vida y que tien l’honor de formar parte del once históricu de Boca Juniors y del conxuntu xixonés que s’oficializó nel centenariu de los dos equipos.

    Competirá con Aire sobre les tables de la llaboral Adolfo Camilo Díaz baxo’l proyeutu ACD que surdió nel 2010 col oxetivu de llevar a la llingua asturiana dalgunos de los clásicos del rock. L’añu pasáu, Camilo Díaz editó un discu con cuatro cantares propios, del que sal ‘La güela’, candidatu al meyor tema del 2012. Ye tamién noveda na gala la presencia de Taranus, banda de folk-metal que presenta a concursu ‘Ensin ti’ (lletra de Diego Díaz Martino’, una balada a trés voces.

   Completen el cartelu de la final al Premiu al Meyor Cantar dos bandes que repiten participación. La Tarrancha, finalista nel 2007 col cantar ‘Exit-encia’, participa con ‘Qué faer!’ (lletra de Delfín Valdés) y Fala Non Caduca, que compitió nel 2011 con ‘Sele Sound System’, nesta ocasión va facelo con ‘Escoyer el camín’ (lletra d’Adrián González Pérez’). Como ye vezu, tamién va actuar nel teatru xixonés el grupu ganador de la edición anterior, Asturiana Mining Company (‘Si nun conoces Vaḷḷouta’), que va interpretar dellos temes mientres el xuráu toma la decisión de quién ye merecedor de viaxar a Còrsica a representar al idioma del país nel festival européu de la canción en llingües minoritaries.

   La gala del VII Premiu al Meyor Cantar, que va ser televisada en direuto pela TPA, va principiar el 1 de marzu a les 20.30 hores. La entrada al espectáculu va ser de baldre.

   Fonte: Asturies.com