TARANUS gana el VII Premiu al Meyor Cantar

Taranus

Taranus va representar a Asturies nel Liet International  de Córsica

   El cantar ‘Ensin ti’, de Taranus, resultó ganador del VII Premiu al Meyor Cantar que se celebró’l viernes nel Teatru de la Llaboral ente glayíos d’oficialidá. La banda de folk-metal va representar a Asturies nel Liet International de Còrsica.

   El xuráu encargáu de decidir cuál yera’l meyor cantar n’asturianu del 2012 ente los cinco finalistes decidióse pol presentáu por Taranus, ‘Ensin ti’, una balada con lletra de Diego Díaz Martino nel que destaca la voz de la sopranu Susana Mortem y que’l grupu va interpretar na seronda en Còrsica en representación d’Asturies y de la llingua asturiana. D’esta forma, Taranus alcuentra recompensa a munchos años de trabayu y esfuerciu que culminaron na espublización del so primer discu, ‘Taranus’, el pasáu mes d’avientu gracies a l’aportación de fondos propios, ensin solicitar subvención a Cultura.

   El restu de formaciones finalistes foron ACD (‘La güela’), Aire (‘Enzo’), Fala non Caduca (‘Escoyer el camín’) y La Tarrancha (‘Qué faer!’). Tamién actuaron na gala de la llaboral, presentada por Sonia Fidalgo y Naciu Varillas, Asturiana Mining Company como formación ganadora de la edición del añu pasáu con ‘Si nun conoces Vaḷḷouta’. Amás de la plaza pa participar nel Liet International, Taranus recibió una escultura de María Xesús Rodríguez entitulada ‘El pascu’ y valorada en 2.000 euros.

Lletra de ‘Ensin ti’:

Suaño podete afalagar
y al espertar muerro d’amor
d’otros siéntote falar
frayándome’l corazón

Faigo l’esfuerciu de dexar
d’imaxinate xunto a min
y nun soi quien a lo llograr
mio boca tien fame de ti

Y al vete siento
que m’afuega’l deséu de querete besar
lloro en silenciu
ardo por dientro al disimular

miro tos güeyos
fáenme falta hasta pa respirar
perdíu m’alcuentro
ensin ti

Autoengáñome al pensar
que pueas mirar pa min
soi un sapu nun bardial
tu una xana nun xardín

Busco escuses pa quedar
pa venos solos los dos
tu pienses que ye amistá
yo desfáigome d’amor

Y al vete siento
que m’afuega’l deséu de querete besar
lloro en silenciu
ardo por dientro al disimular

miro tos güeyos
fáenme falta hasta pa respirar
perdíu m’alcuentro
ensin ti

Y al vete siento
que m’afuega’l deséu de querete besar
lloro en silenciu
ardo por dientro al disimular

miro tos güeyos
fáenme falta hasta pa respirar
perdíu m’alcuentro
ensin ti

La murnia amostálgame
la llercia faime fuxir
manca abondo reconocer
qu’ensin ti nun pueu vivir

Nel mio interior sé bien
que’l to amor nun voi tener
yes un suañu nada más
qu’enxamás escaeceré

Y al vete siento
que m’afuega’l deséu de querete besar
lloro en silenciu
ardo por dientro al disimular

miro tos güeyos
fáenme falta hasta pa respirar
perdíu m’alcuentro
ensin ti

Y al vete siento
que m’afuega’l deséu de querete besar
lloro en silenciu
ardo por dientro al disimular

miro tos güeyos
fáenme falta hasta pa respirar
perdíu m’alcuentro
ensin ti.

Fonte:  Asturies.com

El Teatru de la Llaboral va repetir como sede pal VII Premiu al Meyor Cantar

   El Teatru de la Llaboral va repetir como sede de la gala del Premiu al Meyor Cantar del añu 2012

   Yá se conocen les cinco formaciones que van lluchar el 1 de marzu pol VII Premiu al Meyor Cantar nel Teatru de la Llaboral, que repite como sede de la gala. Éstes son ACD, Aire, Fala Non Caduca, La Tarrancha y Taranus.

   Once yeren les bandes qu’aspiraben a entrar na final d’esti gallardón –La Tarrancha, pese a que nes primeres informaciones nun taba presente, tamién concursó– que cuenta cola participación nel Liet International 2013, que va celebrase esta seronda en Còrsica, como recompensa. Esta edición del Premiu al Meyor Cantar tien la particularidá de que los cinco finalistes avéranse más al rock qu’a la música tradicional, cola esceición d’Aire, grupu formáu Mapi Quintana, Jacobo de Miguel, Xuan Nel Expósito, Elías García y Fernando Arias que nació l’añu pasáu col oxetivu de dedicar un trabayu al acordión diatónicu o de botones, con gran presencia nos nuesos sones, pero poques vegaes protagonista discográficu. Esti conxuntu d’escelentes músicos va participar col cantar ‘Enzo’ (lletra de Ruma Barbero), un homenaxe al xenial Enzo Ferrero, consideráu’l meyor estranxeru que pasara poles files del Sporting nos sos casi 108 años de vida y que tien l’honor de formar parte del once históricu de Boca Juniors y del conxuntu xixonés que s’oficializó nel centenariu de los dos equipos.

    Competirá con Aire sobre les tables de la llaboral Adolfo Camilo Díaz baxo’l proyeutu ACD que surdió nel 2010 col oxetivu de llevar a la llingua asturiana dalgunos de los clásicos del rock. L’añu pasáu, Camilo Díaz editó un discu con cuatro cantares propios, del que sal ‘La güela’, candidatu al meyor tema del 2012. Ye tamién noveda na gala la presencia de Taranus, banda de folk-metal que presenta a concursu ‘Ensin ti’ (lletra de Diego Díaz Martino’, una balada a trés voces.

   Completen el cartelu de la final al Premiu al Meyor Cantar dos bandes que repiten participación. La Tarrancha, finalista nel 2007 col cantar ‘Exit-encia’, participa con ‘Qué faer!’ (lletra de Delfín Valdés) y Fala Non Caduca, que compitió nel 2011 con ‘Sele Sound System’, nesta ocasión va facelo con ‘Escoyer el camín’ (lletra d’Adrián González Pérez’). Como ye vezu, tamién va actuar nel teatru xixonés el grupu ganador de la edición anterior, Asturiana Mining Company (‘Si nun conoces Vaḷḷouta’), que va interpretar dellos temes mientres el xuráu toma la decisión de quién ye merecedor de viaxar a Còrsica a representar al idioma del país nel festival européu de la canción en llingües minoritaries.

   La gala del VII Premiu al Meyor Cantar, que va ser televisada en direuto pela TPA, va principiar el 1 de marzu a les 20.30 hores. La entrada al espectáculu va ser de baldre.

   Fonte: Asturies.com