El folclor de Degaña coles panderetes Arcides y María González

El folclor de Degaña, recoyíu nun discu coles pandereteres Arcides y María González como protagonistes

   ‘Arcides ya María, pandereteras de Trabáu (Degaña)’ ye’l títulu del discu últimu asoleyáu pol Muséu del Pueblu d’Asturies. Ésti recueye’l folclor de Degaña al traviés de 37 pieces interpretaes por estes dos hermanes pandereteres.

   “Esti discu ye mui importante porque Degaña ye un conceyu bastante desconocíu, yá que xente como Lomax o García-Matos nun fixeren grabaciones de campu na zona”, esplica Fernando Ornosa, responsable del Archivu de Música Tradicional del Muséu del Pueblu d’Asturies. L’álbum, que se presentó esta mañana nes instalaciones museístiques, permite sentir un repertoriu bayorosu compuestu por 37 pieces ente les que se pueden atopar bailles a lo suelto como 'Las castañuelas', 'La muñeira', 'L’amudar' y 'La jota'; agarraos como 'La rumba' y 'El valse'; cantares d’aguilandu; villancicos; cantares de ronda; y añaes.

   Toles grabaciones fixéronse en Trabáu, pueblu de les hermanes Arcides (1930) y María (1932) González González, ente los años 1995 y 2012 y constitúin una amuesa completa de lo que ye’l folclor d’esti conceyu del suroccidente del país. “Tamos mui contentes y tamién mui arguyoses”, señaló María a Asturies.com, que, al igual que la so hermana, nunca pensó protagonizar un discu “a les nueses edaes”. Sobre los momentos de grabación, apuntó que siempre abrió les puertes de la so casa a los investigadores pa que sintieren el so repertoriu, anque reconoció que, nun primer momentu, sorprendióse de qu’eses pieces musicales foren d’interés.

   Dalgunos d’esos cantares sonaron esta mañana en Xixón, ánde se desplazaron les dos pandereteres. Foi nun actu nel que tamién tuvieron presentes Ornosa; Xosé Manuel Riesgo, direutor de la Fundación Municipal de Cultura, Educación y Universidá Popular; y Leticia González Menéndez; investigadora nel Departamentu d’Historia del Arte y Musicoloxía de la Universidá d’Uviéu. Tres l’actuación d’Arcides y María, tamién interpretaron delles pieces cola pandereta Lorena Rodríguez ‘Chou’ y la propia González Menéndez, amosando asina’l relevu xeneracional na música tradicional asturiana.

   El trabayu que protagonicen les hermanes de Trabáu ye’l discu númberu 15 de la serie 'Fontes sonores de la música tradicional asturiana' qu’asoleya l’Archivu de la Música Tradicional del Muséu del Pueblu d’Asturies. Esta serie creóse col enfotu d’esparder el repertoriu tradicional calteníu na memoria de los músicos y cantantes asturianos.

   Fonte: Asturies.con