El grupu teatral L'Esfuerzu estrena "Desnudes nel escenariu"

L’Esfuerzu estrena la comedia ‘Desnudes nel escenariu’, d’Ardines

El grupu de teatru llocal L'Esfuerzu

   El Teatru Municipal de Samartín del Rei Aurelio, en L’Entregu, va acoyer esti sábadu l’estrenu de la comedia ‘Desnudes nel escenariu’. La obra, firmada por Xosé Ramón Ardines, va representala’l grupu llocal L’Esfuerzu.

   En ‘Desnudes nel escenariu’ l’aición desendólcase nun teatru onde va representase una función benéfica d’una obra d’amores y reencuentros que tien llugar nuna casería de los años cuarenta. Esta función costumista forma parte d’una gala benéfica cola que recaudar perres pa la parroquia, pero nesta ocasión, amás de la representación y d’una actuación del coru parroquial, hai una sorpresa: delles modelos internacionales tienen previsto acudir al teatru y aprovechar los decoraos pa facer una sesión de fotos enantes de la función pa un calendariu benéficu gracies a la medición d’una moza del pueblu que trabaya nesi mundu; mientres, los actores repasarán les frases enantes de salir a escena. “Trátase d’un espectáculu que xira en tornu al enredu qu’ocasiona’l fechu de que les actrices tengan que sustituyir a les top models nel reportaxe eróticu, al mesmu tiempu que, nesi ensayu últimu, se xenera un conflictu moral ente una de les actrices y el personaxe que tien qu’ interpretar, too ello acompañao pola actuación de Julita interpretando a Lina Morgan y l’actuación del coru dirixíu por David López”, esplica Ardines sobre la so cuarta obra como dramaturgu.

   L’Esfuerzu ye un grupu de teatru amateur que compaxina la so actividá sobre los escenarios con otres actividaes de calter social al traviés de la parroquia de L’Entregu. Nesta ocasión lleven a escena ‘Desnudes nel escenariu’ nel Teatru Municipal de Samartín del Rei Aurelio, que de xuru va acoyer una bona entrada pal estrenu de la obra. El preciu de la entrada ye de 2 euros y el comienzu de la función ta previstu pa les 20 hores.

Fonte:  Asturies.com