20/11/09

L'ALLA denuncia l'intentu de "galleguizar" l'occidente asturianu


L'Academia de la Llingua, al traviés de la so presidenta Ana Cano, ta acabante posicionase alrodiu la polémica pola intención del executivu gallegu, encabezáu por Núñez Feijóo, d'esparder la receición de la televisión gallega nos conceyos asturianos asitiaos ente'l Navia y l'Eo. Según l'ALLA esta iniciativa "respuende a un intentu de galleguizar esta fastera". Diz que nun ye gallegu y pide otra vegada la oficialidá. Dende l'Academia de la Llingua afiten en primer llugar que "nuna sociedá moderna y democrática, onde nin se puede nin se debe tar al marxe de les nueves teunoloxíes de la información, nun se debería poner dengún tipu torga a la receición de dengún mediu de comunicación; nadie lo fairía dende una posición medianamente oxetiva y racional", por cuenta que "cuanto más bayurosa seya la ufierta, más posibilidaes d’escoyeta y de formación tendrá’l ciudadanu; y tamién l’intercambiu cultural ye siempres arriquecedor tanto pal individuu como pa la sociedá".

Sicasí, pa la presidenta de l'ALLA "otra cosa ye, como paez deducise de les declaraciones del Sr. Núñez Feijóo, espeyaes na prensa gallega y asturiana esti día, cuando tres esi mediu de comunicación del que falamos hai intereses de calter políticu; cuando la presencia de la televisión gallega nos conceyos más occidentales d’Asturies respuende a un intentu de galleguizar esta fastera; cuando se venceya a un plan de normalización llingüística, aprebáu per unanimidá pel Parllamentu de Galicia va unos años, pa ser aplicáu nun territoriu que ensin dulda de nengún tipu pertenez a Asturies."

Ana Cano afita que "nun escaecemos que, ente les midíes recoyíes nel referíu Plan Xeral de Normalización da Lingua Galega que surdió de resultes del pautu de gobiernu ente’l Partíu Socialista de Galicia y el Bloque Nacionalista Galego de la llexislatura cabera, unes cuantes d’eses midíes diben empobinaes a la galleguización d’esti territoriu y que, xustamente, ente elles, taba la d’entamar conversaciones coles autoridaes polítiques d’Asturies pa qu’esta fastera recibiere una sintonía perfeuta de la RTVG".

"Y too ello ye más grave", añede, "cuando per parte d’Asturies nun esiste una contrapartida asemeyada, darréu que nun hai una TPA qu’esparda (nin n’asturianu, nin en gallego-asturianu) dientro de la comunidá vecina la realidá cultural y llingüística de nueso".

Poro l’Academia refuga "cualesquier intentu, venga d’onde venga y seya del tipu que seya, de galleguización del territoriu asturianu del Navia-Eo. Pa nós el gallego-asturianu o eonaviegu nun forma parte del denomáu 'galego estremeiro' o 'gallego exterior'”. Sicasí, pidió otra vuelta la oficialidá porque "namái asina se llogrará, ente otres coses, frayar los intentos del espansionismu gallegu de colonizar culturalmente Asturies".

"La normativización y normalización social del gallego-asturianu correspuende namái a l’Academia y al Gobiernu asturianu"
La presidenta de la institución señala que "como ye bien sabío l’Academia reconoz el gallego-asturianu como la variedá llingüística propia d’esti territoriu, con entidá como llingua, qu’habrá ser oficial nel so ámbitu de mou paralelu a la oficialidá del asturianu en tol territoriu d’Asturies" y recuerda que "arriendes d’ello, la normativización y normalización social del gallego-asturianu o eonaviegu correspuende namái a l’Academia de la Llingua Asturiana, cimera institución llingüística del Principáu, y al propiu Gobiernu asturianu".

Nesti sen, encamienta "al Gobiernu d’Asturies que curie los drechos llingüísticos de tolos falantes asturianos y que tome les midíes afayadices pa que nun se produza nengún tipu d’espansionismu gallegu dientro de les llendes territoriales d’Asturies" y urxe a "la reconocencia oficial de la llingua asturiana (y del gallego-asturianu o eonaviegu). Namái asina se llogrará, ente otres coses, frayar los intentos del espansionismu gallegu de colonizar culturalmente Asturies."

Caberamente conseña que l’Academia "enxamás renunciará a l’asturianidá de los conceyos más occidentales del so territoriu y defenderá los drechos llingüísticos de la so xente col mesmu enfotu que defiende los del restu de los ciudadanos d’Asturies".

5 comentarios:

  1. Esos territorios son administrativamente asturianos, naide lu niega. Y les polítiques llingüístiques correspuenden al Gobiernu asturianu. Pero la llingua que ellí se fala nun ye asturianu, ye gallegu; y la ALLA ye una academia de la "llingua asturiana", non de les "llingues d'Asturies".

    ResponderEliminar
  2. Nun sé en que tómbola-y tocó al "anónimo" el títulu de filólogu, pero nun tien razón al dicir que los que se fala nel Navia-Eo ye gallego. Ye un de los territorios llimítrofes ente dos llingües, nel que se fala una mecia de les dos, con rasgos d'un y d'otru. D'ehí lo de gallego-asturianu o eonaviego. Pero lo meyor ye entruga-yos a los propios interesaos y a les organizaciones qu'ellí furrulen, a ver si falen gallego. En cuantes a l'ALLA, ente un de los sos mandaos estatutarios, quiciabis el más importante ye "curiar de los drechos llingüísticos de los asturianos". Y neso ta. Nin más, nin menos.
    Corsino

    ResponderEliminar
  3. Pero home ¿y el gobiernu asturianu onde tá? ¿onde se escuende el Sr. Presidente d'Asturies y coadláteres de turnu? ¿Nun son capaces de defender lo suyu? A ver qué faen agora en pro del patrimoniu astur. Una pena pa toos nosotros.

    ResponderEliminar
  4. Ya taba viéndose dende fai munchu tiempu collacios. Dende Galicia programen, trabayen el asuntu y nun dan puntada al aire. Pero esti asuntu nun ye de agora. ¿Y qué facemos dende Asturies? NA DE NA, ¡ah sí! glayar ¡viva Asturies!, too va perbién ansina, a beber sidrina y xintar delles castañes que ye'l tiempu -que ye lo de nos- y dexar pa los nuesos primos-hermanos perllistos el asuntu de la fala y el devenir del oriente asturianu.

    ResponderEliminar
  5. Tan los ánimos un pelín alteraos. Calma, hom. Ahí ta la Academia de la Llingua Asturiana (felicidaes) que vela pa que la salú de la nosa llingua y el gallegoasturianu o eonaviegu nun se vea afeutada y ninguneada po la ilegalidá de les idegues del Plan Xeneral de Normalizació da Lingua Galega y les sos midíes polítiques de galleguizar l'oriente asturianu programes po la cabera llexislación ya extinguía del PSOE gallego-BNG. Agora paez que puen camudar les coses col nuevo gobiernu gallegu, pero habrá que tar co'l güeyu vivu y bien abiertu, y consensuar y trabayar les correspondientes midíes polítiques dende'l Principau y el so Gobiernu (que niega la oficialdá...), si ye que tenemos un gobiernu d'afechu en pro de los drechos y del patrimonui asturianu. Collacios, menos falar y más trabayar y colaborar n'el tema que ye perimportante.

    ResponderEliminar

Los comentarios tán pendientes de moderación. Espublizaránse lo primero dable.